منتدى احدث الكتب الطبيه والبرامج

Forum latest medical books and programs


    مستقبـــــــل الطبيب

    شاطر
    avatar
    d-forum
    مشرف عام المنتدى

    عدد المساهمات : 1204
    تاريخ التسجيل : 28/10/2009
    العمر : 43

    مستقبـــــــل الطبيب

    مُساهمة من طرف d-forum في 05/11/09, 06:01 pm

    مستقبـــــــل الطبيب

    وهو
    العيـــــــــــــــادة

    الأوراق المطلوبة لتسجيل عيادة خاصة
    1-صورة عقد الإيجار أوصورة عقدالتمليك مثبت التاريخ بالشهرالعقارى +إيصال نورأوتليفون
    2- صورة كارنيه النقابة .
    3- صورة ايصال آخرسداداشتراك للسنة المنتهية .
    4- صورةمن شهادة الأخصائى أو الاستشاري الصادرة من النقابة
    5- رسم تسجيل١٠٠جنيه + رسم معاينة٤٥ جنيه .
    6- روشتة أصلية مدموغة مطبوعة وليست كمبيوتر .
    7- تقدم الأوراق بالنقابة الفرعية وترفق الأصول للإطلاع .
    8- ورقة تحديث بيانات بالنقابة الفرعية.

    تعليمات هامة

    1_ إذا كان الطبيب ممارس عام يكتب على اللافتة والروشتة " ممارس عام " أو " بكالوريوس طب وجراحة .
    2- إذا كان الطبيب أخصائى ترفق شهادة الأخصائى الصادرة من النقابةويلتزم بكتابة التخصص فقط باللافتة والروشتة .
    3- إذا كان الطبيب استشارى ترفق شهادة الاستشاري الصادرة من النقابة ويلتزم بكتابة التخصص
    4- إذا كان الطبيب عضو هيئة التدريس ترفق شهادة من الجامعة تفيد ذلك .
    5- فى حالة وجود شهادة زمالة أو دكتوراه يتم تسجيلها أو ً لا فى قسم السجلات بالنقابة .
    6- يتم مراجعة النقابة في بيانات اللافتة والروشتة قبل كتابة بيانات اللافتة والروشتة

    يراعى في إثبات الملكية أن يكون باسم الطبيب نفسه مع ملاحظة الحالات الآتية :

    1- يكتب الطبيب إقرار على عقد الإيجار أو التمليك بأنه صورة طبق الأصل ويوقع عليه٠
    2- يوثق العقد بالشهر العقارى مع إثبات تاريخ
    3- بالنسبة لإيصال النور أو فاتورة التليفون يقدم الأصل ويكون العنوان موضح بالفاتورة أو الإيصال
    4- في حالة تقديم عقد تمليك يوثق العقد بالشهر العقارى أو يرفق به ايصال الكهرباء أو فاتورة التليفون
    5- يراعى أن تكون العيادة مجهزة تمامًا ، واللافتة موضوعة قبل إجراء المعاينة .
    6- فى حالة رغبة الطبيب فى إضافة شهادات الزمالة أو العضوية من أى دولة يتم إضافتها بشهادة الأخصائى أو الاستشاري أولا بقسم السجلات بالنقابة العامة
    7- يتم تصوير جميع الأوراق من نسختين
    8- تقديم الأوراق بالنقابة الفرعية

    أنا رفعتلكم علي اللينك اللي تحت ده الآتي :

    1- طلب تسجيل عيادة خاصة .
    2- طلب إلغاء تسجيل عيادة خاصة .
    3- الأوراق المطلوبة لتسجيل عيادة مشتركة .
    4- طلب تسجيل عيادة مشتركة .
    5- الأوراق المطلوبة لتسجيل مستشفي خاص ( عقبالكو جميعا )
    6- طلب تسجيل مستشفي خاص .
    7- الأوراق المطلوبة لتسجيل مركز تخصصي .
    8- طلب تدوين التخصص بالعيادات .
    9- الشروط الواجب توافرها في حجرة العمليات الصغري والمتوسطة .
    10- إقرار توصيف العمليات الصغري للعيادات المتخصصة .
    11- عقد المستشفيات والعيادات المشتركة والجمعيات الخيرية .
    12- عقد اتفاق مع المدير الفني .
    13- قانون المنشات العلاجية الخاصة .
    14- تعديل أحكام القانون 51 بشأن تنظيم المنشات الطبية .


    اللينك اهوه
    mediafire.com ?jcsu03qb9w9





    كيف تنجح عيـــــــــــادتك ؟؟

    أولا : صلاة الاستخارة
    ما خاب من استخار وما ندم من استشار

    ثانيا : مكان العيادة
    اختار مكان معروف وحيوي ويفضل يكون جنب الدكاترة علشان المريض اللي يجي لدكتور زميلك يشوف اليافطة بتاعتك وبكده ناس كتير تعرفك

    ثالثا : الدعايا
    لازم تعمل دعايا كويسة أوي أوي للعيادة بتاعتك وده عليه دور كبير سؤاء دعايا بالصوت أو اليافطة أو الدعايا الورقية أو الدعايا علي هيئة هدايا بسيطة زي ساعة حائط لزمايلك الأطباء
    ما تبخلشي علي موضوع الدعايا ده لأنه مهم أوي

    رابعا : المعاملة الحسنة
    لازم تتعلم ازاي تتعامل مع أنواع المرضي وده فن كبير ومش كل دكتور شاطر شغال أوقات نلاقي دكاترة مستواهم عادي أو أقل من العادي بس شغالين طحن لأنهم عارفين يتعاملوا ازاي مع المرضي
    ويا ريت تقرا وتتعلم عن موضوع مهارات الاتصال وخلي أسلوبك لبق ومناسب مستوي المريض الثقافي وكن مقنعا
    ولاحظ أسلوب الدكاترة الناجحين مع مرضاهم
    من الآخر الدين المعاملة

    خامسا : خليك في المعقول
    بالنسبة لأجر الكشف بتاعك أو أجر عملية من العمليات يكون في المعقول يعني ولا هو زايد عن اللي الدكاترة اللي حواليك ولا هو أقل منهم مع مراعاة فرق الدرجة العلمية بينك وبين أساتذة الجامعة
    ولو ربنا أكرمك والعيادة اشتغلت وحبيت تزود بلاش تزود كشفك كتير الرأفة والرحمة والقناعة حلوة

    سادسا : العلاقات
    لازم علاقاتك في الوسط اللي انت بتشتغل فيه سؤاء مستشفي ولا غيرها تكون كويسة ومحترمة ابتداء من العامل في المستشفي حتي مدير المستشفي وكل الناس المحيطة بيك وكن متواضعا
    لا تتكبر علي أي شخص مهما كان سؤاء مريض أو غيره لأنه دي أول حاجة بتطفش منك المريض كن متواضعا التواضع اللي بيحافظ علي علاقاتك مع الآخرين التواضع اللي يرفعك مش التواضع اللي ينزلك تحت

    سابعا : المظهر
    لابد أن يكون مظهرك العام يكون نضيف وجميل وأنيق ويا سلام لو معاك حتة عربية نضيفة هاتعملك برستيج حلو


    ثامنا : شغلك الحكومي
    اشتغل في شغلك الحكومي بما يرضي الله وبضمير لأنه أولا انت محاسب عليه وثانيا علشان هايجبلك شغل في البرايفيت ولو كانت سمعتك حلوة في شغلك الحكومي صدقني ده هايجبلك شغل كويس أوي في عيادتك الخاصة ولو حسيت انك مش قادر علي شغلك الحكومي خد إجازة بدون مرتب أفضل بس بعد ما عيادتك تشتغل

    تاسعا : ارضي
    ارضي بما قسمه الله لك ولا تنظر إلي زميلك ولا تتابع نجاحه خليك في نفسك وطور من نفسك واعلم تمام العلم انه مهما عملت فالأرزاق بيد الله انت بس بتعمل اللي عليك والباقي علي ربنا


    عاشرا : تعلم
    احرص علي انك تتعلم وتقرا وتشوف وتشتغل حجات جديدة وما تسبشي نفسك بعد ما تفتح عيادة بدون تعليم أشياء جديدة لأنه كل يوم فيه جديد في العلم وتأكد كل ما تتعلم أكتر كل ما شغلك بيزيد وحتي لو عيادتك اشتغلت برده احرص علي انك تتعلم لأنه ممكن يجي وقت يظهر فيه دكتور يعرف حجات جديدة انت ما تعرفهاش وده ممكن ينقص من شغلك وما تفتحشي العيادة غير لما تكون تمكنت من التخصص بتاعك ولا تتعجل نجاح العيادة اصبر الناس بتصبر سنة واتنين وتلاتة وربنا بيكرمهم في الآخر


    احدي عشر : أبدا بحاجة جديدة
    يا ريت لو تقدر تعمل حاجة جديدة في عيادتك محدش عملها أبلك من الدكاترة اللي حواليك يبقي ممتاز يعني مثلا لو عيادة باطنة تجيب جهاز سونار أو تخلي العيادة بتاعتك 24 ساعة استقبال لحالات الطوارئ المهم انك تعمل حاجة جديدة تميزك عن اللي حواليك
    اثنا عشر : مظهر العيادة
    لابد ان تكون العيادة مظهرها نضيف ومرتبة ومنسقة ويا سلام لو فيها شويه ديكور هاتدي انطباع حلو للمريض

    ثلاثة عشر: إنها الأمانة
    يا جماعة سيبكم من كل اللي فات اسمعوني في اللي جاي ده
    والله إحنا علينا مسئولية كبيرة أوي قدام ربنا أبل ما يكون قدام أي حد تاني
    اعتبر انه المريض ده والدك أو والدتك أو أخوك أو أختك
    هاتعمل إيه معاه
    اعمل كل اللي تقدر عليه مع المريض بتاعك
    لا تخجل من انك تتهرب بذوق من مريضك من غير ما يحس إذا كنت لا تعرف حالته أو لا تتردد في تحويله الي أحد من زمايلك لو كان محتاج فعلا تحويل
    اعمل اللي يمليه عليك ضميرك بغض النظر عن أي حاجة
    اتق الله مع مريضك أو مريضتك في كل تصرفاتك لأنك ما تعرفشي ممكن يجي عليك اليوم وتكون انت فيه المريض بدلا من الطبي
    واعلم انه الله يراقبك في كل شئ

    ================================================== =======

    انتهي الجزء السادس
    علي وعد بلقاء ان شاء الله في الجزء السابع ( الاداريات ) من سلسلة
    مستقبل الطبيب
    نـــــــداء ورجاء
    إلي كل من قرأ هذا الموضوع
    لا تنسونا من الدعاء بظهر الغيب
    وجزاكم الله كل خير
    والسلام عليكم ورحمة الله وبركاته
    avatar
    d-forum
    مشرف عام المنتدى

    عدد المساهمات : 1204
    تاريخ التسجيل : 28/10/2009
    العمر : 43

    مستقبـــــــل الطبيب وهو الإداريــــــــــات

    مُساهمة من طرف d-forum في 05/11/09, 06:03 pm

    بسم الله الرحمن الرحيم
    إخواني وأخواتي الأطباء والطبيبات
    السلام عليكم ورحمة الله وبركاته
    النهاردة موعدنا من الجزء السابع من سلسلة
    مستقبـــــــل الطبيب
    وهو
    الإداريــــــــــات
    هانتكلم هنا عن الإداريات وهايكون بالأخص ادارايات الوحدة الصحية لأنها بداية الشغل الإداري للطبيب وهي نموذج مصغر لإدارة أي منصب إداري ممكن تمسكه بعد كده
    هانفترض انك استلمت تكليفك كطبيب أول يعني مدير وحدة صحية
    شوف يا سعادة المدير
    هانتكلم في الآتي
    أولا : الحضور والانصراف
    1- مواعيد العمل الرسمية تبدأ من الساعة الثامنة صباحا حتي الساعة الثانية ظهرا لكل الموظفين في الوحدة بلا استثناء
    2- وحدات كتير الموظفين بيجوا الساعة 8 ونص وبيمشوا الساعة واحدة ونص وكله حسب اتفاقك مع الموظفين بس الأفضل انك تجيبهم في ميعادهم وتمشيهم في ميعادهم الرسمي لأنك مش ضامن ممكن يجيلك تفتيش الساعة 8 بالظبط أو الساعة 2 ظهرا ومحدش هايحميك وانت أول واحد هاتتجازي
    3- دفتر الحضور والانصراف يكون مسئول عنه موظف من موظفين الوحدة وممكن انت تكون مسئول عن الدفتر بس الأفضل انه يكون مسئول عنه موظف و يفضل انه يكون الموظف المسئول عن الدفتر هو نفس الموظف المسئول عن الأجازات وخطوط السير في الوحدة

    4- أول حاجة لما تيجي الصبح للوحدة الصبح تتأكد من وجود كل الموظفين عن طريق انك تسأل المسئول عن الدفتر وكل فترة كده اطلب من المسئول عن الدفتر انه يجيب الدفتر وتخلي الموظفين يمضوا عندك حضور وتتأكد من وجود كل الموظفين خصوصا لو حبيت تشد عليهم أو لما تحس انه فيه هرج وعدم التزام في الوحدة
    ولو حد فيهم كان لسه ما جاش يبقي قدامك أكتر من حل
    إما تاخدله إجازة عارضة أو تشطب عليه وتكتب فيه مذكرة وترفعها لمدير الإدارة بوضع علامة اكس في خانة الحضور والانصراف
    أو تستني لحد ما يجي وتخليه يمضي حضور وتنبه عليه بعدم التأخير مرة أخري
    لو كان موظف كويس معاك وشايف شغله صح يبقي ما تشطبش عليه استناه ولو تكرر الحكاية دي معاه نبه عليه مرة واتنين ولو تكرر التأخير منه خدله عارضة
    لو موظف مش كويس معاك ومش شايف شغله كويس نبه عليه مرة واتنين وبعدها إما تاخدله عارضة في كل مرة تأخير لحد ما تخلص العوارض بتاعته أو تشطب عليه وتكتب فيه مذكرة وترفعها للإدارة
    وسؤاء كان كويس أو مش كويس اسأل الأول زمايله فلان ما جاش ليه لحد دلوقتي لأنه ممكن يكون معاه ظروف قهرية زي حالة وفاة معاه مثلا وقتها خدله عارضة رأفة به لظروفه القهرية
    واوعي تمضي لموظف مش موجود عندك في الوحدة لأنه ممكن يكون عامل جريمة بره أو عمل حادثة مثلا وانت مخلي حد من زمايله ماضيله حضور وانصراف طب ازاي ووقتها هاتتحاسب
    وبرده في الانصراف ممكن تطلب من المسئول عن الدفتر انه يجيبه وتخلي الموظفين تمضي انصراف قدامك
    وممكن تطلبه في أي وقت لأي غرض لأنه ممكن موظف يزوغ من الوحدة من غير اذنك ساعتها تشطب عليه في خانة الانصراف وتكتب فيه مذكرة لمدير الإدارة اسمها مذكرة ترك عمل

    5- نبه علي الموظف المسئول والانصراف انه ما يديش الدفتر لأي تفتيش غير بعد ما يجيلك ويستأذن منك ما عدا طبعا لو كان وكيل وزارة أو رتبة كبيرة لكن بتوع التفتيش المالي والإداري بتوع الإدارة أو بتوع مجلس المدينة أو المجلس القروي ما تخليهمشي يمسكوا الدفتر غير بعد ما يستأذنوا منك لأنه ده حقك القانوني انت كبير المكان


    وما تخليش التفتيش ده يجيب الموظفين قدامك علشان يتأكد من وجودهم
    لو عاوز يتأكد يبقي يتفضل في أي غرفة في الوحدة ومعه الموظف المسئول عن الحضور والانصراف
    أو القانوني انه يلف علي الموظفين في الوحدة ويشوفهم موجودين ولا لأ
    6-ما تخليش حد من الموظفين يمضي لحد خلي كل واحد يمضي بنفسه لأنه ممكن تحصل مشكلة ووقتها يقؤل الشخص انه ده مش توقيعه .
    7- لو فيه موظف استأذن منك شفويا وجالك تفتيش وسأل عليه يبقي وقتها لازم تحمي الموظف بتاعك لأنه استأذن منك احميه بأي طريقة لو علاقتك حلوة بالتفتيش قؤله انه مستأذن منك وما تخليهوش يشطب عليه لو مفيش علاقة أو علاقتك بيه مش حلوة خلي الموظف المسئول عن الدفتر يعمله خط سير أو يعمله إذن من غير ما التفتيش يلاحظ انك قؤلتله كده وامضيه بعيد عن التفتيش
    والأفضل انه لو أي موظف حب يستأذن منك يبقي رسمي يعني بخط سير أو إذن رسمي علشان تكون في أمان
    8- دفتر الحضور والانصراف مسئولية كبيرة وأول حاجة بيسأل عليه أي تفتيش والمفروض ما يكونشي فيه كشط أو تعديل في الإمضاء وأي تفتيش يجي خليه يمضي علي صفحة اليوم اللي جاه فيه
    9- رتب أسماء الموظفين الأطباء طبعا في الأول ثم باقي الموظفين بالترتيب وكل سنة ميلادية جديدة بيتغير الدفتر وبيتعمل دفتر جديد .
    10- لو عندك كاتب أو عامل موسمي يعني بالعقد دول ما يتحطش اسمهم في دفتر الحضور والانصراف الرسمي يتعملهم كراسة أو دفتر صغير يمضوا فيه ولو العامل مش بيعرف يمضي يبقي إما تخليه يبصم أو يحط الختم بتاعه في الحضور والانصراف
    11- بالنسبة للنبتشيات فيه نوعين نبتشية من الساعة 2 الضهر لحد الساعة 8 بالليل ونبتشية سهر من الساعة 8 بالليل لحد الساعة 8 الصبح
    وبيكون موجود في النبتشية دي دكتور وممرض أو ممرضة وعامل أو عاملة والبنتشيات بتكون بالتبادل ولازم تعمل جدول للنبتشيات خاص بالأطباء وواحد تاني خاص بالتمريض والعمال وتعلقه في الوحدة وتبعته كل شهر للإدارة بعد ما تمضي عليه الدكاترة اللي معاك والتمريض والعمال
    ولازم تعمل دفتر صغير أو كراسة حضور وانصراف للنبتشيات واحد للأطباء وواحد للتمريض والعمال أو ممكن التلاتة مع بعض
    والطبيب النبتشي هو اللي بيمضي التمريض والعمال ويمضي هو بنفسه والدفتر ده يكون مسئول عنه رئيسة التمريض
    ولو حبيت تبدل نبتشية مع دكتور زميلك يبقي تمضي في الدفتر باسمك وتكتب بدلا من فلان

    12- قانونيا شغلك في الوحدة 24 ساعة ولازم الوحدة تكون مفتوحة 24 ساعة أو علي الأقل تخلي العامل فاتح الوحدة لحد الساعة 12 بالليل لأنه لو جاه أي تفتيش ولقي الوحدة مغلقة بيكون فيه جزاء مش حلو وممكن كمان نقل لو كان وكيل وزارة أو رتبة كبيرة شويه وممكن تنبه علي العامل النبتشي انه لو جاه أي تفتيش يتصل بيك وتخليه يقؤل للتفتيش انك في حالة ولادة بره وتكون سايب أبل ما تمشي من الوحدة خط سير مكتوب فيه حالة ولادة أو كشف خارجي علشان لو اتغيبت تقدر تجيب صورة شهادة الميلاد بتاعة أي طفل اتولد في اليوم ده أو اتكتبت شهادة ميلاده في اليوم ده وتروح بيها الشئون القانونية وتخلع منها بس طبعا ده مش حلال لأنه كذب ولأنه المفروض شغلك يكون 24 ساعة في الوحدة والمفروض مفيش تزويغ .


    ثانيا : الأجازات
    يوجد أكثر من نوع من الأجازات نذكر منها الاتي :
    1- الإجازة العارضة : ودي بتكون 7 أيام في السنة لأي موظف وانت في أول ست شهور ليك من استلامك للتكليف مالكشي غير 3 أيام عارصة بس والاربعة الباقيين بعد الست الشهور الأولي .
    2- الاجازة الاعتيادي : وتكون بتختلف عددها من موظف للتاني حسب عدد سنوات شغله وتقدم الاجازة الاعتيادي ليك أبلها بيوم وأبل ما تمضي عليها وتعتمدها لازم الموظف بتاع الاجازة يكون ماضي ويكون فيه موظف تاني يغطي العمل مكانه يعني لازم يكون فهي بديل عنه ولازم الكاتب بتاع الاجازات يكون كاتب انه الرصيد يسمح والاجازة تتقدم ليك وبعد كده ترفعها للادارة
    أما بالنسبة ليك كطبيب جديد في اول تكليفك مالكشي اجازات اعتيادي في أول ست شهور وغالبا بعد كده تقدر تاخدهم هما عبارة عن 25 يوم في الغالب ممكن تاخدهم علي بعض أو تاخد منهم أيام وتقدم الاجازة دي لمدير الادارة بتاعك ولو عدت عليك سنة وما خلصتش الاجازة الاعتيادي بتاعتك يبقي هاتروح عليك ومش هاتتنقل للسنة الجديدة كذلك باقي الموظفين
    3- الاجازة المرضي : ودي مالهاش فترة معينة يعني مفتوحة وبتكون من خلال انك تغيب من الشغل وتبعت فاكس للوحدة أو الادارة بانك مريض وملازم الفراش ولما ترجع الشغل بيتحدد ليك ميعاد للكشف الطبي في اللجنة الطبية التابعة للادارة واما يحسبهولك مرضي أو ما يحسبهوش مرضي وتتخصم من الاعتيادي وممكن تاخد جزا معاها أو تخصم فترة الاجازة من مرتبك ونفس الحكاية برده مع أي موظف .
    4- اجازة بدل راحة : أي يوم جمعة بتشتغله وبتقعد فيه فيث الوحدة المفروض تاخد مكانه يوم اسمه بدل راحة تقدمه لمدير الادارة بتاعك والنقطة دي ما يعرفهاش دكاترة كتير بس هيا قانونية ميه ف يالميه .
    5- الاجازة بدون مرتب : ودي بتكون بعد ست شهور من استلامك
    التكليف الا اذا كانت دكتورة فيمال ومرافقة لزوجها في السفر ساعتها تقدر تاخد اجازة بدون مرتب من أول يوم من تكليفها .
    6- اجازة وضع : للدكاترة الفيمال أو أي موظفة


    ثالثا : الصيدلية
    1- لو مفيش غيرك طبيب في الوحدة يبقي الصيدلية هاتكون في عهدتك وتقعد فيها مساعد صيدلي أو ممرضة أو شخص له خبرة في الصيدلية بس الموظف ده مش عليه أي مسئولية المسئولية كلها عليك .

    2- دفاتر الصيدلية : دفتر 112 ودفتر 118 ولازم آخر الشهر تظبت الدفاتر دي لأنه الدفاتر دي مصيبة في حد ذاتها لأنه الجهاز المركزي للمحاسبات أو التفتيش المالي بتاع الإدارة بيمسك الدفاتر دي وبيطلع فيها غلط كتير وساعتها ممكن تدفع فلوس كتير من جيبك وتاخد جزا كمان لازم تظبت الدفاتر دي كويس أوي ولازم تعمل المنصرف الشهري وتبعته الإدارة كل شهر ويا ريت تحتفظ بنسخة منه وتشيله معاك حتي بعد ما تمشي من الوحدة لأنه الجهاز المركزي للمحاسبات ممكن يجي بعد سنين ويطلع الدفاتر ويلاقي فيها غلط ووقتها هاتتحاسب . فيه حاجة اسمها دفتر 111 وده النموذج اللي بتطلب فيه طلبية الدواء .

    3- أما بئه لو معاك طبيب تاني يبقي هو مسئول عن الصيدلية وتكون في عهدته ولو رفض انه يستلمها منك فهمه بالراحة ولو رفض رفض تام اكتب فيه مذكرة لمدير الإدارة وهايحققوا معاه وممكن ياخد جزاء وفي الآخر برده هايبقي مسئول عنها غصب عنه . أما بئه لو عندك صيدلي يبقي انت ارتحت من دا كله .

    4- لازم تخلي بالك كويس أوي من تلاجة التطعيمات اللي في الصيدلية من حيث نضافتها وما تحطش فيها أي حاجة خاصة بيك أو بأي موظف حتي الميه وخلي بالك من ترتيب الطعوم فيها وأهم حاجة درجة حرارة التلاجة ولو الكهربا فصلت لأي سبب يبقي تاخد الطعوم وتوديها أقرب وحدة صحية ليك تشيلها هناك لحد ما الكهربا تيجي .

    5- آخر كل شهر اعمل جرد للصيدلية وظبت المنصرف بتاعك بأي طريقة مثال انت مثلا طلبت من مخزن الدواء في الإدارة عدد 500 قرص باراسيتامول استعملت منهم 300 قرص يبقي المفروض الباقي عندك 200 لو عملت جرد ولقيت الباقي منهم 150 يبقي حاول تغطي العجز ده علي التذاكر بحيث يتظبت الوارد مع المنصرف مع الباقي .

    6- ما تخليش حد يدخل الصيدلية غيرك انت أو أي طبيب أو الموظف المسئول عن الصيدلية .

    7- شيك علي الصيدلية وخلي بالك من الأدوية اللي صلاحيتها قربت تنتهي ولو لقيت دواء معين صلاحيته انتهت يبقي ممكن تاخده من زميل ليك في وحدة صحية تانية وتصرفه عندك علي التذاكر في الوحدة وتخلص منه .

    رابعا : التطعيمات ومراقبة الأغذية
    1- يكون مسئول عنها المراقب الصحي بالوحدة بالاشتراك مع كاتب المواليد والوفيات بصورة جزئية ولازم يكون المراقب الصحي علي قدر من المسئولية لأنه دي من الحجات المهمة في الوحدة واللي التفتيش بيجي عليها دايما
    2- حدد يوم أو يومين في الاسبوع لجلسات التطعيم ولازم تعرف المستهدف بتاعك ولازم بأي طريقة تحقق المستهدف ده وتتأكد انه المراقب الصحي بيعمل جوابات استدعاء لكل الاطفال الواجب تطعيمهم ولازم تعرف المتخلفين عن التطعيم وايه سبب التخلف وتبعت للادارة أسماء المتخلفين وتبعت كل كشوف التطيعم الخاصة بالمراقب الصحي .
    3- لازم يكون فيه محاضر اعدام لبعض الطعوم الزائدة بعد ما جلسة التطعيم تخلص .
    4- لازم تتعلم كل شغل التطعيمات وتعرف محتوي كل دفاتر التطعيمات وتعرف جدول التطعيم المصري الرسمي للطفل .
    5- لازم تتأكد من الوارد والمنصرف والباقي من الطعوم .
    6- لو كان فيه حملة شلل الاطفال لازم تتابع الشغل فيها كويس وتطلع تفتش علي فرق التطعيم وتتأكد من وجودهم في الاماكن المحددة لهم لانه دي مسئولية قدام ربنا ولو ظهرت أي حالة شلل في منطقة خدماتك محدش هايرحمك ابتداءا من الوزير حتي مدير الادارة لانه الدنيا بتتقلب وقتها .
    7- لازم تاخد بالك من الشهادات الصحية بتاعة أهالي القرية وتخلي المراقب الصحي يطلع كل شويه يعمل تفتيش في القرية علي الاغذية وعلي الشهادات الصحية .
    8- لازم تتأكد من أخذ عينات الاغذية وعينات الميه بصورة دورية عن طريق المراقب الصحي وتتأكد من محاضر غسيل صهاريج المياه بالقرية ومحاضر مخالفات اكوام الزبالة والروث الحيواني والمجاري بالقرية .
    9- لازم تتأكد من البلاغات الاسبوعية والشهرية اللي بيقوم بيها المراقب الصحي وتعرفها كويس .


    خامسا : المواليد والوفيات
    1- لازم يكون مسئول عنه موظف أمين لانه موضوع المواليد والوفيات ده ممكن يحبسك .
    2- أي حالة وفاة لازم تروح تشوفها بنفسك وأبل ما تروح اسال أي حد تعرفه من القرية يكون أمين عن سبب الوفاة وهل كان المتوفي مريض أم لا اسال محدش عارف خصوصا لو كان صغير في السن أو فيه عدواة بينه وبين حد تاني .
    3- أبل ما تمضي علي شهادة الوفاة تأكد من بيانات المتوفي خصوصا تاريخ الوفاة وبيانات المبلغ بالوفاة وتأكد انه الكاتب بتاع المواليد والوفيات ماضي أبلك
    4- خلي بالك وانت بتكتب سبب الوفاة ولو قدرت تدعم الشهادة بروشتة أو اتنين للمتوفي يبقي كويس .
    5- أي حالة وفاة فيها شبهة جنائية بلغ بيها مدير مكتب الصحة بالادارة فورا لانه هو اللي هايطلعلها الشهادة مش انت
    6- لو كان سبب الوفاة حادثة أو ماس كهربائي أو حريق أي حاجة جنائية يبقي ما طلعشي انت شهادة الوفاة دي يطلعها مدير مكتب الصحة بالادارة انت ممكن تبلغ بيها بس .
    7- لازم تاخد بالك وانت بتكتب تصريح الدفن اسم المتوفي من واقع بطاقته وتاريخ الوفاة ومكان دفن المتوفي وتوقيعك والمفروض مفيش أي متوفي يدفن من غير التصريح ده .
    8- تاخد بالك من شهادات الميلاد وتاخد بالك أكتر من الاطفال ال ساقطين قيد اللي هما اتولدوا وما اتعملشي ليهم شهادة ميلاد لانه المفروض المدة القانونية لاصدار شهادة الميلاد هيا 15 يوم من تاريخ الولادة وممكن تتأكد من تاريخ الولادة عن طريق دفتر الحوامل اللي موجود مع ممرضة الحوامل لانه بتكون كاتبة فيه اسم الست وميعاد ولادتها المتوقع ولو الست مش موجود اسمها في الدفتر ده يبقي تخلي والد الطفل يجيب الطفل وتحدد انت عمره أد ايه تقريبا فوق ال 15 يوم ولا أكتر ولازم يكون مرفق مع الاوراق المطلوبة لاصدار شهادة الميلاد اخطار ولادة سؤاء من طبيب أو مستشفي أو ممرضة أو داية .
    9- تاخد بالك من الرسوم اللي بياخدها كاتب المواليد لما بيجي يطلع شهادة الميلاد لانه اوقات بياخد فلوس زيادة من الناس .


    سادسا : المخزن
    1- - بيكون مسئول عنه أمين المخزن بالوحدة .
    2- بيكون معاه دفتر 112 برده ودفتر 118 برده ودفتر عهد مستديمة وعهد مستهلكة .
    3- كل سنة بيتعمل حاجة اسمها محضر جرد للعهدة الصح انك تعمله فعليا وواقعيا عن طريق تشكيل لجنة من الوحدة ترأسها انت وتراجع كل العهد اللي مع أمين المخازن لربما تكون حاجة مش موجودة أو حاجة بره الوحدة وبتحصل كتير . بس برده لو حبيت تزنق عليه أو لو اكتشتفت انه فيه عهدة مسروقة أو مش موجودة ممكن تعمله محضر جرد مفاجئ وممكن كمان تبعت للادارة علشان تبعتلك تفتيش مالي وإداري يساعدك .


    سابعا : كاتب الماليات
    1- بيكون مسئول عن إيداع فلوس التذاكر والدواء لرصيد الوحدة .
    2- تحرير استمارات المرتب والحوافز والبدلات والنبتشيات وخطوط السير وأي استمارات مالية .
    3- أوقات بيشتغل برده مندوب للصرف بحيث يقبض المرتبات للموظفين .
    4- مسئول عن السلفة المستديمة ودي عبارة عن 100 جنيه تصرف من رصيد الوحدة لتحسين الخدمة بالوحدة من طباعة دفاتر وغيرها ويتم تسويتها ماليا .
    5- خد بالك أوي أبل ما تمضي علي أي حاجة مالية واسأل عليها كويس .


    ثامنا : التأمين الصحي
    1- دي المصيبة الكبيرة في الوحدة وده بيكون في عهدتك وبتمضي عليه واي غلط فيه هاتتحاسب عليه ولازم كل بيانات الروشتة تكون مستوفاة الاسم والتاريخ والتشخيص وغيره وغيره لانه التأمين مش هايسيبك في حالك وبيراجع من وراك كل كلمة واي غلطة بيخصم منك فلوس ولازم تخلي بالك من الدفاتر دي وتشيلها في مكان أمان .
    2- لازم تعرف ايه الادوية اللي تتكتب في روشتة التأمين وايه اللي مش هايتكتب
    3- أقصي حد للادوية تقدر تكتبه هو تلات اصناف فقط .
    4- لازم يكون عندك اكلاشية تختم بيه الروشتات ولو ما ختمتش روشتات التأمين بالكلاشيه التأمين هايخصم منك فلوس .
    5- بعد ما بيخلص الدفتر بتسلمه وتجيب غيره وهكذا .
    6- الدفاتر اللي هاتشتغل فيها هيا دفتر 380 للاطفال الرضع وتمنها نص جنيه . وفيه دفتر قانون 99 لطلاب المدارس بحيث يجي الطالب بتحويل من المدرسة وتكشف عليه مجانا وتكتبله العلاج . وفيه وحدات نادرة بتتشغل علي قانون 32 للموظفين وقانون 79 للمعاشات .
    7- دفاتر التأمين لازم تكون مختومة بختم الشعار .
    8- ممنوع الشطب أو كتابة أدوية خارج الأدوية المحددة في هذه الحالة سوف تعتبر التذكرة لاغية وهاتتحسب عليك .
    9- تذكرة التأمين من أصل صورتين ولازم يكون الكربون طابع في خلف التذكرة .والتذكرة الأصلية دي بتروح الصيدلية أما النسختين الباقيتين للتذكرة بيفضلوا في الدفتر .
    10- كل فترة 3 شهور الي ست شهور بتقبض فلوس التأمين الا اذا كنت وحدة طب اسرة فا هاتاخد فلوس التامين ضمن حافز الدعم الفني


    تاسعا : تنظيم الأسرة
    1- مسئول عنها ممرضة تنظيم الاسرة وانت أو أي طبيب اخر بالوحدة
    2- لازم تتابع تحقيق المستهدف مع ممرضة تنظيم الاسرة شهريا .
    3- لازم تاخد بالك من الفلوس الموردة من تمن وسائل تنظيم الاسرة .
    4- لازم انت بنفسك اللي تركب اللولب وتعطي المشورة وما تسبشي الموضوع ده للمرضة .
    5- كل شهر ولا شهرين راجع دفاتر تنظيم الاسرة مع الممرضة علشان تحس انه فيه حد بيراقب من وراها وعلشان لما يجي تفتيش يلاقي كل الدفاتر سليمة .
    6- كل فترة بتجيلك فلوس انت والممرضة جزء من الفلوس اللي وردتها تمن الوسائل .
    7- تأكد من التعقيم في شغل تنظيم الاسرة .


    عاشرا : رعاية الحوامل
    1- بتكون مسئولة عنها ممرضة الحوامل .
    2- راجع الدفاتر معاها شهريا أو كل شهرين لو أمكن .
    3- تأكد من خروجها من الوحدة لعمل الزيارات المنزلية للولادات وتأكد من إنهم بيروحوا فعلا للست الوالدة .
    4- تأكد انه الممرضة دي بتروح تاخد عينة الغدة الدرقية لاي طفل بيتولد وتأكد انها مش بتاخد فلوس من الست الوالدة .


    احدى عشر : المعمل
    1- راجع الدفاتر معاه كل فترة .
    2- تأكد من انه بيعمل التحاليل بدقة ومش بيفبركها .
    3- تأكد من انه بيبعت البلاغات بتاعته اسبوعيا وشهريا .
    4- تأكد انه مش بيعمل تحليل حمل للستات وبياخد منهم فلوس نظير كده لانه اوقات بيعملوا كده واوقات ممرضة تنظيم الاسرة او ممرضة الحوامل تعمل كده يعني من الاخر تشتغل برايفيت جوا الوحدة .
    5- تأكد من نضافة المعمل .


    اثنا عشر : الرائدات الريفيات
    1- تأكد انها بتخرج فعلا تعمل زيارات منزلية للحوامل وايضا للستات علشان تنظيم الاسرة .
    2- راجع معاهم الزيارات بتاعتهم وهل حققوا المستهدف بتاعهم ولا لأ
    3- اوقات كتير الرائدة الريفية تاخد خط سير وتروح البيت تأكد من كده


    ثلاثة عشر : رعاية الطفل
    1- راجع الدفاتر كل فترة مع الممرضة المسئولة .
    2- تأكد انها بتسجل نمو الطفل والتطعيمات بتاعته .

    أربعة عشر : الطوارئ
    1- تأكد من توافر كل تجهيزات الطوارئ الخاصة بالوحدة
    2- خلي بالك من غرفة الطوارئ لانه القطن والشاش والحجات دي اوقات بتطلع بره الوحدة .
    3- تأكد من وجود أمبولات الطوارئ في غرفة الطوارئ .
    4- تأكد من وجود اسطوانة أكسجين مليانة عندك محدش ضامن الظروف .
    5- راجع السجلات مع الممرضة المسئولة عن غرفة الطوارئ .

    خمسة عشر : ختم الوحدة
    ختم الوحدة سؤاء ختم شعار الجمهورية ولا الختم البيضاوي يبقي معاك انت وبس وما تسلموش لاي موظف اوي حد تاني ولو حصل انك روحت وحدة صحية ولقيته مع موظف استلمه منه
    الاوراق التي تختم بختم شعار الجمهورية :
    1- شهادة الميلاد والوفاة والاستمارات الخاصة بكلا منهما .
    2- الشهادة الصحية للمولود لاول مرة أو بدل فاقد منها .
    3- استمارات المرتبات والبدلات وغيرها من الاستمارات المالية .
    4- تذاكر التأمين الصحي .
    5- ورق التحويل الخاص بالتأمين الصحي
    6- الورق الخاص بدفع رسوم التليفون وغيره .
    7- اوراق وبيانات موجهة للادارة .
    8- المذكرات المرفوعة لمدير الادارة .

    الاوارق التي لا تختم بختم شعار الجمهورية ( النسر ) :
    1- الشهادات الصحية للبائعين واصحاب المحلات دول يتختموا من الادارة الصحية .
    2- الكفيل والضامن والسلفة .
    3- استمارات تحديد نسبة العجز .
    4- الاجازاات المرضية للطلاب اللي أكتر من يوم .
    5- أي ورق شاكك فيه ولا مش عارف محتواه .
    6- خطوط السير والاذونات تختم بالختم البيضاوي


    بعض الأوراق الإدارية

    خط السير
    الاسم:-............... ..... التاريخ :-..../...../....20
    الوظيفة:-.............................. .. الساعة:-.........
    الغرض (المهمة المراد القيام بها:-.............................. ..................
    .............................. .................... .............................. ...........
    .............................. .................... .............................. ...........
    يعتمد طبيب الوحدة

    الإمضاء والختم البيضاوي

    لابد من أن يكون اصل وصورة
    الأصل مع صاحب خط السير (لكي يكتب عليه من الجهة التي ذهب إليها عبارة (حضر المذكور وتختم) وألا اعتبر خط السير وهمي.
    والصورة تكون مع مسئول دفتر الحضور والانصراف(ويمضي صاحب خط السير حضور أما الانصراف يكتب خط سير لو كان لسه ما جاش .)

    الإذن
    السيد مديرالوحدة
    برجاء من سيادتكم السماح لي بإذن ساعتين
    من...... الساعة إلي....... الساعة
    وذلك من اجل...............................
    مقدمه
    ...........................

    يعتمد طبيب الوحدة
    إمضاء فقط


    أمر تكليف
    يكلف السيد / ............ بأعمال ..................
    وذلك ابتداءا من يوم ................. الموافق ...../..../ 20
    وذلك لصالح العمل .
    التوقيع بالعلم
    ..........................
    يعتمد طبيب الوحدة
    الإمضاء والختم النسر
    )يتعمل نسختين واحد يفضل معاك وواحد يفضل مع المسئول المالي والاداري بالوحدة أو كاتب الوحدة وتبعته مع كاتب الوحدة علشان تخليه يمضي ولو رفض الموظف ينفذ الامر المكلف به خلي كاتب الوحدة يكتب رفض المذكور تنفيذ أمر التكليف ساعتها ترفع مذكرة لمدير الادارة وترفق بيها أمر التكليف هايتحول الموظف شئون قانونية وياخد جزا وهاينفذ غصبن عنه )

    مذكرة ( لو الموظف غاب عن العمل )
    السيد الدكتور مدير الإدارة الصحية .............
    تحية طيبة وبعد ,,,,
    نحيط سيادتكم علما بأن السيد / .......... قد تغيب عن العمل يوم ........... الموافق .../...../.....200
    نرجو من سيادتكم اتخاذ اللازم .
    وتفضلوا بقبول وافر الاحترام

    يعتمد طبيب الوحدة
    الإمضاء والختم النسر

    مذكرة عامة
    السيد الدكتور / مدير الإدارة الصحية ب
    تحية طيبة وبعد ,,,
    نحيط سيادتكم علما بأنه ( نبذة مختصرة عن المشكلة ) بكلام واضح
    ولهذا أرجو من سيادتكم اتخاذ اللازم
    وتفضلوا بقبول وافر الاحترام
    يعتمد مدير الوحدة
    دكتور / .........
    الإمضاء والختم
    avatar
    General Practitioner
    عضوا دائم
    عضوا دائم

    عدد المساهمات : 291
    تاريخ التسجيل : 26/10/2009

    رد: مستقبـــــــل الطبيب

    مُساهمة من طرف General Practitioner في 10/12/09, 07:20 pm


      الوقت/التاريخ الآن هو 17/01/18, 10:44 am