منتدى احدث الكتب الطبيه والبرامج

Forum latest medical books and programs

    سلسلة مستقبل طبيب ، تعرف على طريقك فى كلية الطب

    شاطر

    d-forum
    مشرف عام المنتدى

    عدد المساهمات: 1204
    تاريخ التسجيل: 28/10/2009
    العمر: 39

    سلسلة مستقبل طبيب ، تعرف على طريقك فى كلية الطب

    مُساهمة من طرف d-forum في 05/11/09, 05:54 pm

    اخواني وأخواتي الاطباء والطبيبات
    السلام عليكم ورحمة الله وبركاته


    نظرا لما حققه هذا الموضوع من نجاح كبير علي منتديات كثيرة فقد استعنت بالله علي استكمال هذا الموضوع وإضافة المزيد والمزيد من المعلومات والخبرات وتعديل وتحديث معلومات كثيرة طبقا لأحدث القوانين واللوائح

    وكا ن الدافع القوي الذي يدفعني إلي استكمال هذا الموضوع وإعادة صياغته هو أن أقدمه لكم

    كصدقة جارية علي روح المرحوم والدي
    تغمده الله بواسع رحمته وأسكنه فسيح جناته
    ولهذا اسال كل من قرأ حرفا في هذا الموضوع
    بالدعاء له بصالح الدعاء


    وأيضا حرصا مني علي افادة اخواني الاطباء والطبيبات بكل الخبرات التي اكتسبتها منذ استلامي العمل
    آملا من الله أن تنفعكم هذه السلسلة في دنياكم واخرتكم


    فهذة السلسلة تحتوي علي كل ما يخص مستقبل الطبيب في كل حياته
    فكما تعلمون أن حياة الطبيب سلسلة من الكفاح والمثابرة والعمل الشاق ولابد أخي الطبيب أن تعلم من أين تبدأ وكيف تنتهي حتي يمكنك تحقيق النجاح في مستقبلك باذن الله
    ويعلم الله كم كلفني كتابة وعرض هذه السلسلة من وقت ومن مجهود ذهني وبدني

    ويمكن لأي طبيب أو طبيبة نقل هذا الموضوع الي أي منتدي حتي تعم الفائدة علي الجميع بشرط أن يكتب هذه المقدمة وأن تسألوا الاعضاء المشاركين علي المنتدي الذي ينقل فيه الموضوع أن يدعوا للمرحوم والدي ولي بصالح الدعاء وهذه أمانة أسالكم اياها

    أتمني انكم تستفيدوا من هذه السلسلة
    وربنا يوفقكم ويكرمكم ويحقق لكم كل ما تتمنوه

    ولا تنسونا بالدعاء بظهر الغيب


    ==================================================

    ** مستقبل الطبيب **

    إنها الرحلة

    فلنبدأ سويا الرحلة منذ ظهور نتيجة الثانوية مرورا بالكلية ثم الامتياز بصورةعابرة ثم

    الجزء الأول : البداية ( كيف تختار الطريق )
    الجزء الثاني : التكليف ( قوانينه وكيف تستفيد من هذه الفترة )
    الجزء الثالث : النيابات ( قوانينها وكيف تختار التخصص المناسب لك )
    الجزء الرابع : التسجيل ( قوانينه وكيف تحضر رسالة ماجستير أو دكتوراه )
    الجزء الخامس :الزمالات(الأجنبية-المصرية) وشهادات المعادلة ( وكيف تحصل عليها )
    الجزء السادس : العيــادة ( اجراءتها وكيف تنجح عيادتك )
    الجزء السابع : الادارايات ( وكيف تكون مديرا ناجحا )
    الجزء الثامن : السفر للعمل بالخارج ( وكيف تحقق أكبر استفادة من السفر )
    الجزء التاسع : الــــزواج ( وكيف تختار شريك حياتك المناسب )
    الجزء العاشر : الأسرة المسلمة ( وكيف تربي أطفالك )




    الجـــــزء الأول

    البدايـــــــــــــــــــــــــــــــــــــة


    كيف تختار الطريق ؟؟


    خلصت الكلية بحلوها بمرها بكل حاجة فيها
    وبدأ الامتيــــاز
    والآن نحن علي وشك نهاية الامتياز؟؟
    إلي أين الطريق ؟؟
    ماذا بعد الامتياز؟؟

    أخي الطبيب ... أختي الطبيبة

    أمامك أكثر من طريق عليك أن تختار واحد من 4 طرق


    الطريق الأول : الجامعة
    الطريق التاني : الأكاديمية
    الطريق التالت : وزارة الصحة
    الطريق الرابع : الاستقالــــــة




    الطريـــــــــــــق الأول

    الجــــــامعة

    وده طريق أوائل الدفعة
    في أواخر الامتياز كليات الطب بالجامعات بتنزل إعلان بتطلب فيه أطباء مقيمين في الأقسام الأكاديمية والاكلنيكية والأعداد المطلوبة حسب حاجة كل قسم
    والأقســــــــــام كالآتي
    الأقسام الأكاديمية
    تشريح – فسيولوجي – كيمياء حيوية – هستولوجي – باثولوجي – فارماكولوجي – ميكروبيولوجي – باراسيتالوجي
    الأقسام الإكلينيكية
    الباطنة العامة - النفسية والعصبية – الجلدية – الصدر – أمراض الدم – الغدد الصماء – الكبد والحميات – الأورام – روماتيزم
    الأشعة – الاكلنيكال باثولوجي – القلب
    الأطفال – الصحة العامة – الطب الشرعي
    الجراحة العامة – جراحة الأطفال – جراحة التجميل – جراحة الأوعية الدموية – جراحة صدر وقلب- جراحة المخ والأعصاب – جراحة العظام
    الأنف والأذن والحنجرة – الرمد – نساء وتوليد – جراحة أورام – المسالك – التخدير



    طيب علي أي أساس بيختاروا نواب الجامعة وبيكون ازاي ؟؟
    بالنسبة للأقسام الأكاديمية
    هاتكتب رغبات للأقسام اللي عاوز تدخلها
    وحسب احتياج القسم وحسب التقدير والرغبات يتم الاختيار
    وهاتتعين معيد بالقسم وهاتحضر الماجستير وبعد الماجستير تحضر الدكتوراه
    وتكمل في سلك الجامعة
    والأقسام دي مريحة للفيمال أكتر
    فيه بعض الأقسام الأكاديمية ممكن تفتح بعد الدكتوراه من خلالها
    معمل تحاليل زي قسم الفارما وقسم الميكروبيولجي
    معمل باثولوجي زي قسم الباثولوجي
    ولو حبيت تفتح عيادة في أي تخصص تاني اكلينيكي يبقي بعد ما تاخد الدكتوراة في القسم الأكاديمي تسجل ماجستير في تخصص اكيلينيكي وبعد ما تاخد الماستر تقدر تفتح عيادة في التخصص اللي اخدت فيه الماستر

    بالنسبة للأقسام الاكلنيكية
    الاختيار بيكون علي أساس حاجة القسم وحسب التقدير وحسب الرغبات
    والنيابة مدتها تلات سنين أو أربعة لو ليك جيش لكن ما دام أنت نايب جامعة يبقي مش هاتتاخد ظابط احتياط
    وبعد ما تخلص النيابة إما
    1- انك تاخد الماستر بتاعك والجامعة تستغني عنك ووقتها تتعين في وزارة الصحة كمساعدأخصائي أو طبيب مقيم مؤهل لمدة سنة ثم مساعد أخصائي وتكمل حياتك المهنية في وزارة الصحة
    أو
    2- انه القسم يثبتك عنده وتكمل وتحضر الدكتواره وتسلك سلك الجامعة لحد ما توصل أستاذ دكتور


    طيب ازاي بيختاروا النواب وازاي يختاروا النواب اللي هايتثبتوا ؟؟
    كل قسم بيحدد العدد اللي محتاجه كل سنة من الأطباء المقيمين وهانفترض انه قسم زي النسا مثلا طلب خمس نواب يبقي أعلي خمس نواب مقدمين علي النسا هاتجيليهم النيابة ويحضروا الماستر وبعد ما يخلصوا الماستر بتاعهم القسم بيحدد النواب اللي هايثبتوا عنده ممكن يحتاج واحد ممكن يحتاج اتنين ممكن يثبت الخمسة كلهم ممكن ما يثبتشي حد من الخمسة كله حسب احتياج القسم
    وطبعا طريقة التثبيت بتكون لأعلي النواب درجات في البكالوريوس
    يعني لو القسم احتاج واحد علشان يثبته يبقي هاياخد أول واحد من الخمسة النواب دول الأول في درجات البكالوريوس مش الأول في الماستر
    المميـــــــــزات
    1-هاتتعلم كويس ببساطة لأنه أقل جامعة أحسن من معظم أماكن وزارة الصحة
    2- هاتختصر وقت كبير في حياتك المهنية بمعني انك هاتاخد الماستر في تلات سنين من أول تخطي برجلك نيابتك وأوقات أربع سنين لما يكون عندك جيش
    3- ممكن تتثبت وتبقي مدرس مساعد وده حسب احتياجات القسم وبعد كده تحضر دكتوراة وتبقي مدرس وهكذا لحد ما توصل أستاذ دكتور وده شئ جميل علميا واجتماعيا وأوقات كتير ماديا .
    4- هاتنفع أولادك من بعدك لأنه طبعا التوريث في الجامعات أصبح شئ واقعي ومسلم بيه وهايكون ليك علاقات كتير .
    5- لو كانت علاقاتك حلوة مع الاستاف بتاع القسم ومستواك كويس وحسب حاجة القسم أو عندك واسطة في القسم ممكن تتعين حاجة اسمها أخصائي تالت في القسم لو ما اتثبتش ويكون ليك كل صلاحيات المدرس المساعد إلا حاجة واحدة بس اللي هيا التدريس للطلاب وتحضر الدكتوراه زيه برده بس في حالة إذا اتعينت أخصائي تالت هاتتطر انك تستقيل من وزارة الصحة .

    العيـــــــــوب
    1- ممكن ما تاخدشي التخصص اللي نفسك فيه وبتحبه ممكن تكون طالع الستين علي الدفعة وعاوز نسا مثلا لكن اللي أبلك هايكتبوا نسا والقسم عاوز مثلا خمسة والخمسة دول ترتيبهم التراكمي أبلك وقتها هاتتطر انك تكتب تخصص تاني غير النسا اللي بتحبها
    نصيحتي لو انت ليك نيابة جامعة بس النيابة اللي بتحبها مش هاتجيلك


    اكتب تخصص مقبول بالنسبة ليك وتكون فيه سنيور و يكون فيه فرصة للتثبيت وتكمل في الجامعة
    أما لو مش هاتثبت في القسم ده وبتحب تخصص تاني مش هايجيلك فيه نيابة وانت متمسكبالتخصص اللي بتحبه أوي يبقي اتكل علي الله وخد تكليفك في وزارة الصحة وبعدها نيابة في وزارة الصحة أما لو مش فارقة معاك تخصص يبقي خد أي تخصص في الجامعة
    2- الدخل المادي أثناء نيابتك في الجامعة مش كويس يعني النايب بتاع الجامعة بياخد بتاع 400 جنيه بالكتير بس بعد أول سنة ليك في النيابة بتقدر تشتغل مع الأساتذة يعني هاتلاقي فرص شغل سواء في عيادات الاستاف أو في أي مكان تاني واهي كلها فترة وتعدي .
    3- هاتتحطن شغل أثناء النيابة يعني ممكن تقعد تشتغل 48 ساعة خصوصا في الأول لما تكون نايب جنيور وأنا شايف انه ده مش عيب بالعكس دا ميزة علشان تتعلم كويس إلا إذا كنت انت بطبيعتك مش بتحب تتعب وقتها هايكون عيب مش ميزة .
    4- لو انت عاوز تسافر أثناء النيابة في الجامعة مش هاتقدر إلا إذا كنت مرافق لزوجتك في سفرها .
    5- لا يحق ليك فتح عيادة إلا بعد الدكتوراة لو هاتثبت وتكمل عندهم أو بعد الماستر إذا كنت هاتاخد الماستر وهاتمشي من الجامعة ومالكشي تثبيت بعدها هاتروح وزارة الصحة وتشتغل أخصائي .

    الطــــــــــريق الثاني
    أكاديمية الجيش أو أكاديمية الشرطة
    هاتلاقي إعلان نزل من الجيش والشرطة بعد ظهور نتيجة الثانوية العامة وهاتقدممع اللي هايقدموا إلي كلية الشرطة أو الحربية وهاتسحب نفس الملف وعاوزين أطباءعلشان يتخرجوا بعد ست شهور في الأكاديمية علي رتبة ملازم أول طبيب
    لو عاوز تقدمها تسحب ملف وتملا البيانات وتقدم الملف وتمتحن امتحان القدرات بعد كده تجتاز امتحانالرياضة بعد كده الكشف الطبي بعد كده امتحان الهيئة
    الممـــــــــيزات
    -1 انك في الغالب هاتتعلم كويس أوي لأنه مستشفيات الجيش نضيفة جدا وغالبا الشرطة
    -2 هاتعلق نجمتين جنبه الهلال يعني دكتور وظابط والحاجة دي بيحبها الناس اللي بتحب المظاهر ( مع انك مش محتاج منظرة لانك اساسا دكتور )
    3- هاتقدر تعملعلاقات حلوة ومع الوقت هايكون ليك سلطة خصوصا لو دخلت اكاديمية الشرطة
    -4 المرتب بتاعها برده أعلي من وزارة الصحة أبل الزيادة الحالية لأطباء الصحة بس مش فرق كبير
    5- فيه ميزة حلوة خصوصا في مستشفيات الجيش انك ها تحضر دكتوراة علي حسابهم أو زمالة اجنبيه

    6- هايكون ليك جميعالحقوق والمزايا التي يعامل بها ظابط الشرطة أو ظابط الجيش
    العيــــــــــوب
    -1 انك بتتعامل كظابط الأول ثم كطبيب يعني انك هاتكون محكوم بقوانين العسكريةأو الداخلية يعني من الآخر كبت للحرية

    -2 انك مش ضامن تتوزع فين يعني ممكن تروح وحدةعسكرية في الصحرا لو تبع الجيش أو تروح تشتغل طبيب في سجن لو تبع الشرطة
    إلا إذا كان معاك واسطة جامدة هاتروح مكان كويس

    -3 هاتفضل طول عمرك تتنقل من محافظة للتانية في حركة التنقلات اللي بتحصل كل شويه يعني النهاردة انت في القاهرة بكره في مستشفي قنا العسكري

    -4 مش هاتقدر تفتح عيادة غير بعد الدكتوراه أو الزمالة يعني بعد ما تبقي في الغالب رائد
    -5 لو دخلت وحبيت تستقيل يبقي لازم تدفع بتاع 50 ألف جنيه تعويض ليهم أو تستقيل من غير ما تدفع اي حاجة بس بعد ما تاخد رتبة رائد

    6- فيه عيب خطير تاني انك مش هاتقدر تسافر تشتغل بره مصر أثناء خدمتك وحتي لو سويت معاشك وحبيت تسافر معظم أو كل دول الخليج مش بتسفر الأطباء العسكريين




    الطــــــــــريق الثالث
    وزارة الصحة
    معظم الناس بتسلك هذا الطريق علشان كده هاشرحه بالتفصيل في جزء لوحده
    خلاص انت علي وشك انك تخلص الامتياز
    انتظر قليلا هاتظهر حركة التكليف غالبا في أواخر ديسمبر وهاتظهر النتيجة في نص فبراير واستلام العمل بيكون من أول مارس
    وهايتم الإعلان عنها وتروح تسحب الملف وتملئ الرغبات بالمديريات والإدارات الصحية اللي ترغبها علشان تتوزع عليها
    وكل الدكاترة خريجي الدفعة بيقدموا حتي اللي بيتاخدوا نواب في الجامعة برده بيقدموا ولو اتثبتوا وخدتهم الجامعة هايستقيلوا من وزارة الصحة ويكملوا في الجامعة ولو ما اتثبتوش يرجعوا لمكان تكليفهم الأصلي

    وطبعا التوزيع بيكون علي حسب

    الاحتياجات و التقدير و الرغبات
    يعني مثلا هايقؤلك محافظة سوهاج أخدت من 70 % معني كده انه اللي جايب 70 % فما فوق وكاتب سوهاج كرغبة له يبقي هاتجيله سوهاج مادام الرغبات اللي أبل كده مش قابلاه أو كانت سوهاج هيا أول رغبة له

    والتكليف في وزارة الصحة بينقسم إلي قسمين
    إمــــــــا
    التكليف في هيئات وزارة الصحة ( رغبات إجبارية )
    أو
    التكليف في جهات جهات خارجية ( رغبات اختيارية )



    الطريق الرابع والأخير

    الاستقــــالة

    تقدرتلغي التكليف بتاعك وتبقي طبيب حر وبكده تقدر تسجل علي طول وطبعا مالكشي نيابة فيوزارة الصحة ومالكشي شغل في الحكومة خلاص انت استقلت
    وادينص المادة من القانون

    مادة(14:)يجوز إلغاء التكليف للأطباء الراغبين فىذلك، كما يجوز اعادة تكليفهم مرة أخرى بعد العرض على لجنة التكليف، وبشرط أن يقدمطلب اعادة التكليف خلال المدة المقررة للتكليــف طبقـــا لأحكام القانــــونرقــــم 29 لسنة 1974 بشأن تكليف الأطباء ومن فىحكمهم.
    المميـــــــــــزات
    هاتقدر تسجل كطبيب حر بعد ما تستقيل علي طول في التخصص اللي انت عاوزه وتخلص ماسترك أو دبلومتك بسرعة بدل ما تستني تخلص التكليف وبعد كده تستني النيابة وبعد كده تستني تسجل يعني من الآخر هاتختصر وقت
    مفيش مميزات تانية أنا شايفها في موضوع الاستقالة ده
    العيـــــــــــوب
    كتير وما تعدش وأنا شخصيا لا أشجع أي طبيب أو طبيبة علي الاستقالة لأسباب كتيرة منها :
    1- ماديا مفيش أي دخل مضمون ممكن تدخله لأنك ببساطة استقلت حتي لو قؤلت هاشتغل برايفيت هاتشتغل ازاي وأنت متخرج من الكلية أبيض لانه الاحتكاك والشغل في وزارة الصحة مهما كان بيعلم مهارات كتير وطبعا مش هاتقدر تتعلم علي حد في شغل البرايفيت ومش هايكون فيه شغل برايفيت كويس قدامك لانه مفيش مكان كويس هايقبلك لانك ببساطة لسه خام .

    2- تقدر تعمل اللي انت عاوزه بدون الاستقالة يعني تقدر تاخد نيابتك وتقدر تسجل وتقدر تاخد إجازة بدون مرتب وتعمل زاير في أي مكان نضيف وتتعلم فيه بس هيا مسالة وقت واللي خلاك تصبر ست سنين في الكلية مش هاتقدر تصبر كام سنة علشان تسجل وتاخد نيابتك يبقي ايه لازمة الاستقالة .
    3- لما تكون شغال في مستشفي حكومي ده بيجبلك شغل كتير في عيادتك لانه اسمك بيتبني الأول في المكان اللي انت شغال فيه في الحكومة .
    4- هاتفقد بعض المميزات مستقبلا زي التدرج الوظيفي يمكن في يوم من الأيام تمسك منصب في وزارة الصحة ليه تضيع علي نفسك فرصة ممكن تكون حلوة .
    5- يمكن في يوم من الايام أوضاع الأطباء تتحسن وتبقي المرتبات حلوة ومرضية للأطباء يبقي ليه تضيع علي نفسك فرصة ممكن تكون حلوة برده .



    خطوات إلغاء التكليف


    1- صلاة الاستخارة
    2- طلب إلغاءتكليف في الإدارة العامة للتكليف بالوزارة
    1- تروح مرة فيخلال أسبوع علشان تتأكد إن جوابك ماتركنش
    2- الدور الخامسفي المبنى الطويل ... هوا كده ... الطويل .. اللي بتدخل من بابه الوزارة ...بعدأسبوع من الطلب تروح تستلم قرار الإلغاء من مدام سهير و جواب تعمل بيه إخلاء طرف منالمديرية و تختمهم من عند أستاذ مجدي .... هاتقوللك تاني مكتب يمين ... ماتنخدعش ... أستاذ مجدي في المكتب اللي في وشها
    3- الموافقة علىإخلاء الطرف من مدير الشئون الوقائية بالمديرية و مدير المديرية
    4- لو وراك حاجهفي الشئون القانونية روح خلصها
    5- جواب إخلاء طرفمن الإدارة للوحدة
    6- إخلاء طرف منالوحدة
    7- إخلاء طرف منالإدارة
    10 – اخلاء طرف من المديرية
    11- تاخد استمارة 7لسنة 72 من المديرية و إخلاء الطرف إلى الوزارة
    12-سيب بطاقتك معمدام سهير علشان هاتديلك الطلبات و أصل قرار إلغاء التكليف
    13-تصور 5 طلباتل5 شهادات طبيب حر + طلب إنك عاوز الشهادات دي
    14-تشتري بـ 10جنيه دمغه
    15-تستلم 5 شهاداتو قرار إلغاء تكليفك المختوم صورة طبق الأصل
    16-تنزل الدورالرابع تسلم الطلبات في مكتب الشهادات ممكن تجيلهم بعد ساعتين و تقولهم يغيروا طلبالنقابة بـ لمن يهمه الأمر
    17-تاخد قرارإلغاء التكليف للنقابة أو الشهادة المقدمة لها و تنزل السجلات في بدروم النقابة ... ماتخافش ... البدروم مكيف...
    18-تاخد إذن دفعمن إدارة السجلات
    19-تروح مكتب 8يطلع بياناتك من الكمبيوتر
    20-تروح مكتب 7تدفع حداشر جنيه خمسه و سبعين قرش
    21-تروح مكتب ستةبالإيصال و القرار يعملك شهادة إلغاء التكليف
    22-تمضيها من مكتبالسجلات
    23-تمضيها وتختمها من مكتب 9
    24-ماتنساش تعملصورة طبق الأصل ... ممكن تبقى تحتاجها




    =========================================


    انتهي الجزء الأول


    علي وعد بلقاء ان شاء الله في الجزء الثاني ( التكليف ) من سلسلة
    مستقبل الطبيب

    نـــــــداء ورجاء
    إلي كل من قرأ هذا الموضوع
    لا تنسونا من الدعاء بظهر الغيب
    وجزاكم الله كل خير

    والسلام عليكم ورحمة الله وبركاته
    دكتــــور
    أحمد رفعت عدلي

    d-forum
    مشرف عام المنتدى

    عدد المساهمات: 1204
    تاريخ التسجيل: 28/10/2009
    العمر: 39

    رد: سلسلة مستقبل طبيب ، تعرف على طريقك فى كلية الطب

    مُساهمة من طرف d-forum في 05/11/09, 05:54 pm

    إخواني وأخواتي الأطباء والطبيبات
    السلام عليكم ورحمة الله وبركاته
    النهاردة موعدنا مع الجزء الثاني من سلسلة
    مستقبـــــــل الطبيب
    وهو
    التكليف في وزارة الصحة
    قؤلنا في الجزء السابق انه التكليف في وزارة الصحة إما أن يكون :

    أولا : التكليف في هيئات وزارة الصحة
    1- القطاع الوقائي ويشمل
    الوحدات الصحية بالريف – وحدات صحة الأسرة – المراكز الصحية بالمدن وحدات رعاية الأمومة والطفولة – عيادات الأحياء – مستشفيات التكامل – مكاتب الصحة
    المميـــــزات
    1- ماديا كويسة وممتازة خصوصا لو روحت مكان فيه شغل برايفيت كويس مع انه اليومين دول شغل البرايفيت بقي مش مجدي أوي .

    اللي هاتاخده كالآتي
    * مرتبك + حافز الطبيب ال 150 % + حافز الدعم الفني ( تضاءل أوي اليومين دول وقد يكون شبه انعدم ) باستثناء مكتب الصحة لا يوجد هذا الحافز + حافز ال 240 % اللي بيصرف للطبيب الأول والتاني بس + شغل البرايفيت لو فيه شغل برايفيت
    2- لو عاوز تزوغ ممكن بسهولة تزوغ وممكن تقسم الشغل بينك وبين بقية الدكاترةاللي معاك يعني هايكون عندك فرصة انك تذاكر في اي حاجة أو تسجل أي حاجة اليجال أوتشتغل برايفيت في أي مكان تاني مع مراعاة الحرمانية في حالة التزويغ .
    العيــــــوب
    1- شغلك هايكون إداري أكتر منه طبي خصوصا لو بقيت مدير الوحدة أو اشتغلت في مكتب صحة وهاتتعامل مع موظفين غاية في الإهمال والتسيب معظمهم مش كلهم وطبعا انت متخرج من الكلية ومش عارف حاجة في الادرايات فا تحس انه نفسيتك تعبت شويه .
    2- كل من هب ودب جاي يفتش عليك باليل والنهار اشي رئيس مجلس المدينة أو النائب بتاعهأو التفتيش المالي والإداري بتاع الإدارة أو المديرية أو الوزارة الرقابة الإداريةالجهاز المركزي للمحاسبات المحافظة . وعلي فكرة دي مش مشكلة أوي للي عارف وفاهم ادارايات كويس لأنه هايعرف اللي ليه واللي عليه ويعرف يوقف أي حد عند حده ويعرف يحمي نفسه قانونيا من أي أخطاء إدارية علشان كده لازم تتعلم ادارايات كويس أوي وأبل ما تعمل أي حاجة اسأل .
    3- علشان تاخد نيابة لازم تقضي سنة أو سنتين في التكليف مدة عمل فعلية لأنه الأجازات مش بتتحسب وبعد ما تاخد النيابة تستني بتاع سنة ونص علشان تقدر تمتحن الفيرست بتاع الماستر.
    4- مستواك الطبي والعلمي ومستوي ذكائك في الغالب بيكون في انحدار مستمر ان لم تطور نفسك لأنك مشهاتتعلم حجات جديدة كتير بالعكس لو قعدت كتير في الريف من غير ما تطور نفسك طبيا هاتلاقي نفسك بتنسي الطب .


    2- القطاع العلاجي ويشمل

    مستشفيات وهيئات وزارة الصحة

    يعني انك تشتغل طبيب تكليف في مستشفيات وزارة الصحة بطريق الانتداب ودي عاوزة كوسة لأنه المفروض التكليف يكون في القطاع الوقائي مش العلاجي ( المستشفيات ) يعني بعد ما تظهر نتيجة التكليف بتاعتك وتلاقي نفسك روحت مثلا وحدة صحية تقدر تعمل انتداب منها للعمل باحدي المستشفيات كطبيب تكليف بس طبعا دي عاوزة واسطة .
    المميــــــزات
    1- هاتتعلمكويس خصوصا لو روحت مستشفي كويسة وهاتشتغل في قسم حسب حاجة العمل ورغبتك ورغبة مدير المستشفي
    2-هايكون ليك علاقات حلوة مع الدكاترةزمايلك والأخصائيين والاستشاريين ومع موظفين المستشفي وحاول تكون علاقاتك حلوة مع كلالناس اللي في المستشفي خصوصا الموظفين والعمال والتمريض وبتوع الأمن
    3- تقدر تعمل اسم لنفسك في بلدك من خلال انك تخدمأي حد تشوفه من أهل بلدك وتكون تعرفه أو ما تعرفوش شخصيا
    علشان لما تفتح عيادة يكون اسمك مألوف وتكون عملت جمايلمع ناس كتير وأبل ده كله خدمة
    الناس شئ كويس وربنا بيجازيك عنها خير
    العيـــــــوب
    1- ماديا مش زي طبيب الوحدة الصحية لأنك مش هاتاخد حافز ال 240 % وكمان حافز الدعم الفني وكمان مفيش برايفيت
    اللي هاتاخده هو مرتبك وحافز الطبيب ال 150 % ويمكن شويه فكة من صندوق المستشفي وأوقات بعض المستشفيات بتدي فلوس للنبتشيات
    2- شغل متعب أكتر من شغل الوحدات الصحية دا إذا كنت بدور علي الراحة يعني ومش هاتقدر تزوغ كتير لأنه بيكون عليك نبتشيات وبيكون فيه التزام في المستشفي اكتر طبعا من الوحدات الصحية

    ثانيا : التكليف في الهيئات الخارجية

    انه بعض الهيئات بتكون عاوزة دكاترة تكليف وبعد ما تخلص التكليف فيها وتجيلك نيابة بترجع تاني وزارة الصحة الهيئات دي هيا :
    الشركة القابضة للمستحضرات الحيوية واللقاحات-وزارة التضامن الاجتماعى (من الذكور)- الهيئة القومية للبحوث والرقابة على المستحضرات-وزارة التعليم العالى ( الوحدات العلاجية ) - شركة مصرللغزل والنسيج-شركة مصر للطيران- جامعة الاسكندريه- جامعة قناة السويس- الإدارة الطبية- المركز الطبى بكلية العلوم- إدارة المعامل والأشعة- إدارة المدن الجامعيه- المركز الطبى بكليه التجارة- الهيئة العامه للتامين الصحى- جامعة المنصورة- مستشفي الطلبة- الإدارة العامة للشئون الطبية – إدارة السجون بوزارة الداخلية- الجيش

    المميــــــــــزات
    أولا : ممكن تلاقي تعليم كويس أوي في بعض الأماكن زي الجامعة – مستشفي الطيران
    ولو اخدت تكليفك في إدارة السجون ممكن بواسطة قوية تروح مستشفي نضيفة تابعة لوزارة الداخلية زي مستشفي الشرطة بالعجوزة
    وأوقات مستشفيات الجيش بتكون عاوزة أطباء تكليف ممكن برده تروح مستشفي جيش نضيفة زي مستشفي قصر القبة العسكري بواسطة
    ودلوقتي فيه حاجة جديدة نزلت في التكليف انه ممكن تاخد تكليفك في الجامعة بشرط انه مجموعك يسمح وموافقة وزارة الصحة وموافقة الجامعة وده مش سهل بس ممكن وفيه ناس عملتها
    ثانيا : أوقات وزارة الداخلية تنزل نيابات عندها وممكن لو اخدت تكليفك عندهم يكون ليك الأولوية في انك تاخد نيابة عندهم وتكمل معاهم ووقتها هاتستقيل من وزارة الصحة وهاتبقي تبع الداخلية طبيب مدني في الهيئات الطبية التابعة لوزارة الداخلية سؤاء السجون أو أي هيئة أخري بس النيابات دي قليلة ومش كتيرة زي حركة النيابات بتاعة وزارة الصحة وممكن ما تاخدشي التخصص اللي نفسك فيه .

    كمان لو روحت هيئة التامين الصحي فيه فرصة انك تروح مستشفي تأمين كويسة تتعلم فيها كويس
    بس طبعا دي مش مضمونة لانه مستشفيات التامين اللي كويسة مش كتيرة وممكن تتوزع علي مكتب من مكاتب التأمين العادية
    ده بالنسبة للتعليم والتكليف في إدارة السجون والجامعة والتأمين والجيش لكن باقي الهيئات الخارجية اللي فوق دي أعتقد مفيش فرصة كبيرة انك تتعلم كويس فيها
    العيـــــوب
    1- ماديا مش مغرية يعني انت أساسا بتاخد مرتبك من وزارة الصحة لأنك انتداب وغالبا هاتاخد حافز الطبيب ال 150 % وبس مفيش أي دخل تاني إلا إذا الهيئة اللي انت شغال فيها ادتك حاجة زيادة زي مثلاا جزء من فلوس الصندوق أو فلوس نبتشيات لو كانوا بيدوا فلوس علي النبتشيات .
    2- معظم الهيئات الخارجية مفيهاش تعليم كويس باستثناء الجامعة وبعض مستشفيات التأمين وبعض مستشفيات الجيش
    هانفترض مثلا انك روحت تكليف في وزارة الداخلية هاتشتغل في إدارة السجون وبصراحة المكان ده مش حلو ولا فيه أي تعليم وممكن تروح مكان بعيد كمان عن مكان إقامتك الا إذا كان عندك واسطة جامدة وروحت مستشفي شرطة نضيفة

    ( كيف تستفيد من فترة التكليف )

    الكثير من الإخوة الأطباء والطبيبات يعتقدون أن فترة التكليف فترة لا يمكن تحقيق أي فائدة منها وتجدهم دائما في حالة شكوي وضيق من هذه الفترة .
    وأنا شخصيا أري أنها فترة يمكن استغلالها بشكل ممتاز بالرغم وجود كثير من السلبيات عن طريق :
    - لو عندك وقت فراغ كبير في التكليف ليه ما تستغلوش في حاجة مفيدة زي مثلا انك تذاكر في تخصص معين انت بتحبه ولا حتي بلاش كلمة تذاكر دي خليها تقرا هاتنمي قدراتك الطبية وهاتفضل مرتبط بالطب وكمان ممكن تتطبق اللي بتقراه علي الحالات اللي بتكشف عليها كل يوم . والأفضل انك أثناء التكليف تحدد تخصص معين يكون مناسب ليك وبتحبه أو علي الأقل مقبول ليك ويكون مناسب لمجموعك وتبدأ تركز عليه وتحاول تعرف عنه حجات كتير وتشتغل فيه

    - ليه ما تروحشي يوم مثلا في الأسبوع تشتغل فيه في مستشفي معينة تتعلم بعض المهارات الطبية المفيدة

    - ممكن أثناء فترة التكليف تلتحق بأي زمالة أجنبية أو معادلة وتبدأ تذاكر وممكن تخلص جزء من الزمالة أو المعادلة وأثناء نيابتك تكمل الباقي .

    - ليه ما تحاولشي تتعلم الادارايات أثناء تكليفك هاتقؤلي أنا دكتور ومش متخرج من الكلية علشان اشتغل إداري هاقؤلك انه الإداريات مهمة أوي للدكتور والدكتور الذكي يعرف ادارايات كويس أقل حاجة يعرف ازاي يأمن ويحمي نفسه ادارايا علشان ما يقعشي في أي مشاكل إدارية لأنك بتشتغل تحت لوائح وقوانين

    - برده ممكن تستفيد من التكليف ماديا عن طريق انك تشتغل برايفيت وحتي لو كان شغل البرايفيت مش أوي ماديا بس هاتستفيد منه طبيا اوي

    - ليه ما تحاولشي أثناء فترة التكليف تعمل اسم لنفسك في الوسط المحيط بيك ده هايساعدك
    لما تيجي تفتح عيادة لأنه اسمك هايكون إلي حد ما اتردد كتير خصوصا لو كان مستواك
    كويس .

    - ليه ما تحاولشي تعمل شغلك كما هو مطلوب منك أثناء فترة التكليف حتي لو كان
    الشغل ده مش ممتع أو شغل إداري بس انت مطالب بيه قدام ربنا أبل ما يكون قدام
    المسئولين لأنه ببساطة قبلت الشغل في المجال ده وبتاخد مرتب نظير قيامك بالمهام دي
    وما تحججشي بحاجة انت اعمل اللي عليك وما يهمكشي أي حد ولا أي حاجة أهم حاجة
    ترضي ربنا وترضي ضميرك في شغلك لأنه أمانة وكلنا هانتسأل علي الأمانة دي.

    - لو انت عندك الإمكانيات المادية انك تجوز أثناء التكليف ليه ما تفكرشي انك تبحث
    عن انسانة كويسة مناسبة ليك وتجوزها وبكده تكون حققت هدف كبير في حياتك .
    أهم حاجة حدد هدفك وشوف انت عاوز ايه ونفسك في ايه والدكتور الذكي هو اللي يقدر يستفيد من فترة التكليف طبيا و ماديا وإداريا واجتماعيا




    =========================
    انتهي الجزء الثاني
    علي وعد بلقاء ان شاء الله في الجزء الثالث ( النيابات ) من سلسلة


    d-forum
    مشرف عام المنتدى

    عدد المساهمات: 1204
    تاريخ التسجيل: 28/10/2009
    العمر: 39

    رد: سلسلة مستقبل طبيب ، تعرف على طريقك فى كلية الطب

    مُساهمة من طرف d-forum في 05/11/09, 05:55 pm

    مع الجزء الثالث من سلسلة

    مستقبل الطبيـــب

    النيابــــــــات

    امتي بتظهر حركة النيابات ؟؟
    الحركة الأساسية شهر نوفمبر من كل عام
    الحركة التكميلية في شهر مايو من كل عام
    أعرف منين انها ظهرت ؟؟
    هاتلاقي إعلان في الجرايد الرسمية
    هاتلاقي زمايلك بيقؤلولك إنها ظهرت
    تتصل بالوزارة او المديرية وتسأل
    التقديم بيكون فين ؟؟
    التقديم بيكون في المديريات وممكن برده تقدم في معهد ناصر
    ازاي أقدم علي النيابة ؟
    دلوقتي الوزارة بتخلي الناس تقدم من خلال النت وأول مرة عملوها في الحركة التكميلية بتاعة 2009 بس يمكن يخلوا بعد كده التقديم من خلال المديريات زي زمان علشان كده هاشرح طريقة التقديم من خلال المديرية عن طريق :
    أولا
    هاتروح تسحب المظروف من المديرية مجاني
    أو ممكن أي حد من زمايلك يجبهولك
    بس أوقات فيه مديريات بتغلس وتطلب انه الشخص نفسه هو اللي يجي يسحب المظروف
    ثانيا
    هاتملئ الرغبات بتاعتك

    ثالثا
    هاتروح بعد كده تقدم المظروف
    لو انت مش فاضي علشان تروح تقدم المظروف ممكن حد قريبك من الدرجة الأولي يقدملك المظروف وهايدوله إيصال ولازم تحتفظ بالإيصال وتعرف رقمه
    ولو عاوز تقدم من خلال النت تروح المديرية اللي فيها الجامعة اللي انت متخرج منها وتجيب من عندهم الرقم السري وتروح المديرية في المحافظة اللي انت بتشتغل فيها تجيب رقم الطبيب وتقدر من خلال موقع الحكومة الالكترونية
    طيب انت مسافر بره مصر وعاوز تقدم نيابة ينفع ولا لا ؟؟؟
    ينفع تخلي أي حد يسحبلك الملف وتخليه يكتب رغباتك
    بس بشرط
    تخلي حد قريبك من الدرجة الأولي هو اللي يسلملك الملف همابيشترطوا كده في تسليم الملف
    امتي بتظهر نتيجة النيابة ؟؟؟
    يعني هاتاخدلها شهرين أو أقل أو أكثر بحاجة بسيطة علشان تظهر
    هاعرف ازاي انه النيابات ظهرت ؟؟
    هاتلاقي زمايلك كلهم متابعين وممكن تتصل بالوزارة أو بالمديرية
    طيب التنسيق بتاع النيابة بيكون علي أي أساس ؟؟
    بيكون علي أساس الاحتياجات – المجموع – الرغبات
    ملحوظة بالنسبة للمجموع بيكون بالمجموع الاعتباري
    طيب واحد هايقؤلي أنا خريج الأزهر والدرجات عندنا غير باقي الكليات
    انه المجموع بتاعك هايضرب في رقم معين
    بحيث في الآخر تتساوي بنفس التقدير بتاع طبيب آخر في أي كلية تانية غير الأزهر
    بمعنـــــــــــــــــــــــــي
    المجموع الاعتباري = مجموع الطبيب ÷ النهاية العظمي للجامعة ×4600

    طيب ازاي بيتم التنسيق بتاع النيابة ؟؟؟

    اللي بيحصل يا أخوانا انه ابل حركة النيابة ما يظهر التقديم عليها
    الوزارة بتبعت للمديريات وتقؤلها ابعتولنا احتياجاتكم من الدكاترة في التخصصات الطبية المختلفة
    هاترد المديرية وهاتبعت للوزارة الأعداد المطلوبة في كل تخصص
    بعد كده بيظهر اعلان الحركة ويتم التنسيق
    وكل تخصص في كل مديرية بيكون له حد أدني
    يعني مثلا
    نسا مديرية الصحة بسوهاج كانت واخدة من 75 % معني كده انه أي حد جايب اقل من كده وكتب نسا سوهاج مش هاتيجيلو
    فا هايشوفوا الرغبة اللي تحتها لو تناسب مجموع الدكتور هاتبقي هيا دي نيابته لو مش تناسبه ينزله للرغبة اللي تحتها وهكذا ولو ما فيش رغبة ناسبت مجموعه يبقي وقتها هايكون
    استنفذ الرغبات
    وفي الحالة دي يحق له التقديم علي النيابة في أقرب حركة نيابة تنزل بعد كده
    طيب واحد ممكن يسأل أنا ليا كام رغبة ؟؟
    24 رغبة في التخصصات الملحة و 48 رغبة في باقي التخصصات

    طيب ايه هيا التخصصات الملحة دي ؟؟
    هـــي
    طب الطوارئ- طب الأسرة- الطب النفسى- الأشعة- التخدير- المعامل- العناية المركزة- العظام- الأطفال المبتسرين- بنك الدم- طب المسنين- جراحة القلب والصدر
    بس خلي بالكم كل سنة التخصصات الملحة بتتغير يعني ممكن ما ينزلوش تخصص ملح ويخلوه تخصص مش ملح
    طيب ماهي الفترة اللي المفروض اقضيها في التكليف علشان اخد نيابة ؟
    أولا : لو هاتقدم في التخصصات الملحة يبقي مش هاتحتاج تقضي أي فترة في التكليف
    يعني انت مثلا هاتستلم تكليفك في شهر مارس ولما تظهر حركة النيابة التكميلية في مايو أو الحركة الأساسية في نوفمبر تروح تقدم علي التخصصات الملحة بدون شرط قضاء فترة في التكليف بس خلي بالكم أوقات يشترطوا ست شهور تكليف علشان تعرف تقدم في التخصصات الملحة
    ثانيا : لو هاتقدم في باقي النيابات يبقي لازم تقضي فترة سنة في التكليف علشان تقدر تقدم في باقي النيابات زمااااان كان لازم تقضوا سنتين في التكليف وأنا سمعت انهم ها يرجعوا شرط قضاء سنتين تكليف علشان تعرف تقدم في التخصصات الغير ملحة
    نصيحتـــــــــــــــــــــي
    ما تستعجلشي
    لو كنت بتحب تخصص معين في التخصصات الملحة يبقي خلاص قدم فيه
    لو مش بتحبه يبقي استني سنة في التكليف علشان تاخد االتخصص اللي بتحبه واللي تقدر تبدع فيه

    طيب ظهرت نتيجة النيابة
    امتي وازاي استلم النيابة ؟؟
    امتي ؟
    لما بتظهر نتيجة النيابة بتسأل في المديرية بتاعتك النيابة وصلت من الوزارة ولا لسه لانها بتكون ظهرت علي النت ابل ما تروح المديريات
    لو راحت المديرية هاتستلم النيابة بعد ست شهور من ظهورها وده قرار جديد السنة اللي فاتت كان الاستلام بيكون بمجرد وصول نتيجة الحركة للمديرية
    ازاي؟؟
    تروح لمدير الرعاية الأساسية اللي في المديرية وتقؤله عاوز استلم النيابة هايقؤلك اكتب طلب لوكيل الوزارة وهايبص علي اسمك وهايكتبلك في الطلب السيد وكيل الوزارة حيث أن المذكور مرشح لنيابة كذا
    هاتروح لوكيل الوزارة هايوافق وهايكتب شئون العاملين لإخلاء طرفه من الوحدة لتنفيذ النيابة في مستشفي كذا وهايوزعك أو ممكن مدير الطب العلاجي في المديرية يوزعك علي مستشفي معينة في المحافظة دا لو هما مش عاوزينك في التكليف لكن لو حاجة العمل تتطلب انك تفضل في التكليف فترة فا من سلطة وكيل الوزارة أنه يأخر استلامك للنيابة
    هاتروح شئون العاملين هايدوك خطاب إلي الإدارة بتاعتك علشان تخلي من الوحدة بتاعتك هاتروح الإدارة هايدوك جواب إلي الوحدة لاخلااء الطرف هاتروح الوحدة هاتخلي وهاترجع الإدارة تخلي وهاتروح المديرية تخلي
    يبقي انت كده أخليت من القطاع الوقائي مبروك وداعا للتكليف
    وهاتروح بئه للموظف المسئول عن تنفيذ النيابة وهاتستلم النيابة في المديرية وهاتاخد منه جواب موجه للإدارة بتاعتك علشان تستلم النيابة وبعد كده هاتروح للإدارة اللي هاتديك جواب موجه إلي المستشفي اللي اتوزعت فيها
    أما لو انت جاتلك مستشفي تعليمي أو مستشفي تأمين صحي أو أي هيئه أخري المديرية هاتديك خطاب موجه مباشرة إلي هذه الهيئة

    طيب ممكن ألغي النيابة بتاعتي وأرجع الريف تاني ؟؟؟
    اه ممكن تلغيها بس برده هاتتحرم من التقديم حركتين متتاليتين
    طيب هل أقدر أغير النيابة بتاعتي ؟؟؟
    تقدر تغير النيابة بتاعتك بشرط انه النيابة الجديدة اللي انت عاوزها يكون الحد الادني بتاعها مناسب لمجموعك
    وأوقات يشترطوا انك تكون كاتبها في الرغبات بتاعتك
    مثال
    أطفال مديرية الصحة بالقاهرة مثلا اخدت من 80 %
    وانت جاتلك نيابة جراحة
    وعاوز تغيرها لأطفال تقدر تغيرها بس بشرط تكون جايب علي الأقل مجموع الأطفال اللي هيا 80 %
    طيب هل أقدر أسافر أو اخد إجازة بدون مرتب واسيب النيابة وبعد كده ارجع ابقي أكملها ؟؟
    ابل الإجازة بدون مرتب لازم تستلم النيابة الأول وبعد كده تاخد الإجازة بدون مرتب سؤاء للسفر أو لأي سبب آخر
    والمفروض الإجازة دي لا تزيد عن سنتين لأنه مشمسموح ليك انك تبعد عن النيابة أكتر من سنتين لو غبت عن النيابة أكتر من سنتينهاتتلغي النيابة بتاعتك وهاتتحرم حركتين متتاليتين
    طيب تعمل ايه لو جاتلك النيابة بتاعتك غلط ؟؟؟
    تقدم تظلم لأنه بيفتح باب التظلمات بعد ظهور النتيجة لمدة 15 يوم في المديريات و في معهد ناصر
    وبعدها بشهر أو اتنين تظهر نتيجة التظلم وتاخد حقك انشاء الله ولازم تكون محتفظ بالإيصال اللي اخدته زمان لما سلمت المظروف
    وبرده لما هاتقدم علي التظلم هايدوك إيصال احتفظ بيه
    كيف تحسب فترة النيابة ؟؟؟
    تحسب من أول يوم استلمت فيه النيابة ولو اخدت إجازة أثناء النيابة لا تحسب هذه الإجازة من فترة النيابة
    هيا النيابة كام سنة ؟؟؟
    النيابة أربع سنتين عمل فعلي خلالها لازم تاخد درجة علمية أعلي من البكالوريوس سؤاء دبلوم أو ماجستير
    بعد الأربع سنين بتبقي طبيب مقيم مؤهل لمدة سنة بعد كده تبقي مساعد أخصائي
    طيب افتراضا ما ماقدرتش اخد أي درجة علمية خلال الأربع سنين ايه اللي يحصل ؟؟؟
    هايدوك فرصة تانية لمدة تلات سنين لو ماقدرتش تاخد فيهم درجة علمية تحول للشغل الإداري
    طيب افتراضا جاتلي نيابة تعليمي أو نيابة تأمين صحي هل معني كده اني هاقعد طول عمري في المستشفي التعليمي دي أو مستشفي التأمين الصحي دي ؟؟
    لا النيابة في المسشتفيات دي أو أي هيئة غير مديريات الصحة بتكون فترة مؤقتة ( انتداب ) أربع سنين وبعد ما يخلصوا الأربع سنين وتكون اخدت دبلوم أو ماستر ترجع المديرية اللي انت تابع ليها أصلا
    إلا إذا
    نزلتلك درجة مالية في التعليمي أو التأمين الصحي أو المراكز الطبية المتخصصة واتعينت في المستشفيات دي وده بيحصل في حالة وجود كوسة قوية جدا جدا أو لو كان حظك كويس أوي بدون واسطة
    أنا استلمت النيابة بتاعتي وبعدها روحت الجيش هل يعتبر الفترة اللي هاقضيها في الجيش محسوبة من فترة النيابة بتاعتي ؟؟؟
    أيوه محسوبة وتقدر تسجل وانت في الجيش وتقدر تمتحن كمان
    طيب لو جاتلي نيابة وما استلمتهاش وروحت الجيش ؟؟
    أولا النيابة هاتروح عليك
    ثانيا لا تحسب فترة الجيش دي من فترة النيابة لأنك علي قوة التكليف مش النيابة لأنك ما استلمتش النيابة
    طيب أقدر أغير مكان النيابة بتاعتي يعني انقل من محافظة للتانية ؟؟
    ممكن في بداية النيابة بالكوسة أما قانونيا بعد مضي سنتين عمل فعلي في النيابة إلي في المحافظة اللي رشحت فيها في البداية بشرط موافقة الجهتين وهما بيراعوا الحالات الأسرية بالنسبة للفيمال وكمان بيراعوا الحالات الطبية الخاصة
    طيب لو مر عليا خمس سنين وما قدمتش علي نيابة أقدر أقدم بعدها علي نيابة ؟؟؟
    لا ليس لك الحق في التقديم علي نيابة بعد مرور خمس سنين في التكليف عمل فعلي يعني لو واخد اجازة بدون مرتب مش هاتتحسب من السنين الخمس سنين
    ولو عديت الخمس سنين عمل فعلي
    تقدر تقدم علي نيابة الريف
    طيب ايه هيا نيابة الريف دي ؟؟
    دي معناها انك تقدم علي نيابة وانت شغال في الريف يعني تقعد طول عمرك تشتغل في القطاع الوقائي وماتشتغلشي في المستشفيات إلا إذا كنت عامل انتداب للمستشفي
    والحركة بتاعة نيابات الريف دي بتنزل كل سنة غالبا في شهر أبريل
    وبتاخد سنة تدريب في المستشفي وبتحضر خلال النيابة دي دبلوم أو ماستر
    يعني من الأخر هاتبقي أخصائي بس شغلك هايكون في القطاع الوقائي اللي هو الريف أو أي شغل وقائي إلا إذا عملت انتداب إلي مستشفي
    كام دخل النايب المادي أثناء فترة النيابة ؟؟
    أولا : المرتب
    ثانيا : حافز الطبيب 300 %
    ثالثا : 45 جنيه عن كل نبتشية بحد أقصي عدد 12 نبتشية في الشهر
    رابعا : نسبة من فلوس الصندوق بتاع المستشفي
    خامسا : نسبة من الاقتصادي لو المستشفي مطبقة الاقتصادي
    طيب إيه هيا الأماكن اللي أقدر أقدم نيابة فيها ؟؟؟
    أولا : مديريات الصحة
    ثانيا : هيئة التأمين الصحي
    ثالثا : المستشفيات التعليمية
    رابعا : المؤسسة العلاجية
    خامسا :الأمانة العامة للصحة النفسي
    سادسا :المراكز الطبية المتخصصة
    سابعا : المراكز الإقليمية لبنوك الدم
    ثامنا : التجميل والحروق
    تاسعا : طب المسنين
    عاشرا : الحجرالصحى

    طيب إيه هيا مميزات وعيوب أماكن النيابات ؟

    أولا

    مديريات الصحــــــــــة
    المميــــــــــزات

    -1 القبول بيكون من مجموع قليل مش زي التعليمي ولا أي مكان تاني
    يعني أصحاب المجاميع العادية ممكن يلاقوا التخصص الليبيحبوا يتخصصوا في مديريات الصحة والمديريات هي المكان الأكثر قبولا للنواب عليمستوي باقي هيئات وزارة الصحة وبيقبل أعداد كبيرة
    -2 فيه مديريات فيها مستشفيات كويسة وفيها تعليم كويس زي مثلا مستشفي أم المصريينبالجيزة لكن فيه مديريات كتير فيها مفيهاش أي نوع من أنواع التعليم خصوصا في بعض التخصصات
    -3 يعني ممكن تاخد راحتك في الشغل شويه خصوصا في الجراحاتيعني تقدر وأنت من أول سنة نيابة تعمل عمليات كتير بايدك بس المهم تلاقي حد يعلمككويس

    -4 حافز الطبيب ال 300 % بيصرف لنواب مديريات الصحة ومشموجود في أماكن تانية

    -5 لو اتشهرت في المستشفي اللي بتشتغل فيها ده هايساعدك لماتفتح عيادة في نفس المدينة أو المنطقة اللي فيها المستشفي
    العيـــــــــــوب
    -1 بسهولة جدا ممكن تاخد النيابة من أولها لاخرها من غير ماتتعلم شئ يعني قصة التعليم في مديريات الصحة بصراحة مش مضمونةإطلاقا

    -2 ماديا مش حلوة أوي يعني فيه جهات بتدي فلوس أكتر منها زيهيئة التأمين الصحي بتاخد فيها حوافز زيادة خاصة بالتأمين
    3- ممكن تتوزع علي مستشفي بعيدة عن محل إقامتك لأنه التوزيع بيكون علي من خلال تنسيق علي مستوي الجمهورية

    ثانيا
    هيئة التأمين الصحي
    ومنها
    مستشفي مدينة نصر – مستشفي صيدناوي – مستشفي المقطم – مستشفي

    6 أكتوبر – مستشفي الفيوم – مستشفي النيل – مستشفي جمال عبدالناصر

    مستشفي كرموز – مستشفي الطلبة سبورتنج – مستشفي الهلال سوهاج
    المميـــــــــزات
    -1 ممكن في بعض المستشفيات التابعة للتأمين مش كلها يكون فيه تعليم وبعض المستشفيات بيكون مشرف عليها أساتذة من الجامعة
    -2 ماديا إلي حد ما كويس لأنه فيها حوافز أكتر من مديريات الصحة
    والفترة اللي جاية هايكون للتأمين الصحي مستقبل وفلوس كتير خصوصا بعد ما يفصلوا الخدمة عن التمويل وذلك بإنشاء صندوق خاص يتولي إدارة التأمين الصحي لأنه معايير الجودة بتتطبق دلوقتي في مستشفيات كتير من مستشفيات التأمين يعني مستقبلا التأمين هايكون له وضع مميز
    -3 بيقبل من مجموع متوسط يعني مش صعب انك تلاقي فهي نيابة حلوة يعني الحد الأدنى بتاع التخصصات مش كبير
    العيــــــــــــــوب
    1- ممكن ماتلاقيش تعليم كويس في مستشفيات كتير
    -2 ممكن ماتاخدشي راحتك في الشغل بايدك في الجراحات

    ثالثا
    المستشفيات والمعاهد التعليمية
    وتشمل علي
    مستشفي أحمد ماهر التعليمي – مستشفي المطرية التعليمي – مستشفي الجلاء التعليمي – مستشفي الساحل التعليمي – مستشفي سوهاج التعليمي – مستشفي أسوان التعليمي – مستشفي شبين الكوم التعليمي – مستشفي بنها التعليمي – مستشفي دمنهور التعليمي
    معهد جراحة القلب والصدر – معهد السكر – معهد التغذية – معهد شلل الأطفال – معهد بحوث الحشرات – معهد السمع والكلام – معهد الرمد التذكاري – معهد الأبحاث لطب المناطق الحارة – المعهد القومي للكلي والمسالك البولية
    المميــــــــزات
    -1 دي أحسن جهة بعد الجامعة ممكن تلاقي فيها تعليم كويس وتطلع منهانايب محترم علميا لأنه اللي حواليك كلهم بيكونوا واخديندكتوراة او زمالة أجنبية وكمان أوقاتكتير تلاقي أساتذة جامعة بيتشغلوا فيها ويمكن كمان تلاقي في بعض الهيئات فيها تعليمأحسن من الجامعة
    -2 لو معاك واسطة أو بالنصيب ممكن ينزلك درجة مالية وتثبت عندهم وتحضردكتوراه
    العيــــــــــوب
    1- فيه مستشفيات فيها مش كويسة إلي حد ما بساغلبها كويس وأهم حاجة انك تدخل الهيئة بعد كده الانتداب من مستشفي للتانية سهل مادام دخلت الهيئةالتعليمية

    2- المستشفيات والمعاهد التعيلمية بتقبل من مجموع عالي يعني فيهنيابات فيها بتاخد من مجموع زي نيابات الجامعة
    -3 ماديا زيها زي وزارة الصحة لأنك بتاخد مرتبك من وزارة الصحة لانك انتداب


    رابعا
    المؤسسة العلاجية
    أشهر مستشفي فيها هيا مستشفي هيليوبلس

    المميــــــــــزات

    1 - يعني ممكن تلاقي فيها تعليم لأنه بشتغل فيها أساتذة جامعة وكمان استشاريين من الجيش

    2- ماديا كويسة لانك بتاخد فيها بدلات كتير زي بدل طبيعة العمل و بدل العدوي و نسبة من قيمة حصيلة رسم الخدمة شهريا و الحوافز المقررة مقابل النوبتجيات

    العيـــــــــــــــوب

    1- في الجراحات ممكن ما تتعلمشي كويس لأنه معظم الشغل فيها بفلوس والمريض بيدفع كتير فا مش هاتاخد راحتك في الشغل
    2-فيه مستشفيات فيها مش كويسة عاوزة واسطة علشان تقدر تلتحق بمستشفي نضيفة



    سادسا
    المراكزالطبية المتخصصة
    وتشمل

    أ‌-متعددة التخصصات وتشمل :
    معهد ناصر – الهرم – الهلال – العجوزة – السلام – دار الشفاء – الشيخ
    زايد – شرق المدينة – القباري – المواساة – المنصورة الدولي – الأقصر
    الدولي – أبوسمبل الدولي – شرم الشيخ الدولي
    ب‌-أحادية التخصصات وتشمل :
    المركز القومي للرمد بروض الفرج - مركز الرمد الأزهر - مركز الصدر والحساسية بإمبابة - مركز تأهيل وعلاج المسنين بحلوان – المركز القومي
    لخدمات نقل الدم– مركز الإسعاف الطائر – مستشفي الأطفال التخصصي ببنها – مركز القلب بالمحلة – مركز القلب والكبد بكفر الشيخ – مركز كفر الدوار
    ج – جراحات اليوم الواحد وتشمل :
    بمدينة نصر – البساتين – المرج – روض الفرج – الزاوية الحمراء – التبين – راس البر – وادي النطرون – سمالوط – قنا – مرسي علم – كفر الزيات – اشمون
    د- مراكز الأورام وتشمل :
    أورام السلام – أورام معهد ناصر – أورام طنطا – أورام البحيرة – أورام دمياط – أورام المنيا – أورام سوهاج – أورام أسوان

    المميــــــــــزات
    1- تعليم كويس أوي في معظم المستشفيات التابعة ليها وفيها استاف جامعةكتتتتتتتير واستشاريين كتير أقل واحد معاه دكتوراه

    2- ممكن من خلالها تتعرف علي شخصيات ليهاوضعها وممكن من خلالها تشتغل مع استاف بره
    3- فيه مستشفيات فيها التردد بتاعها قليل وده مش بيديك فرصة انك تشتغل كتير
    العيـــــــــــــوب
    1- ممكن برده ماتاخدشي راحتك أوي في شغل الجراحات
    2- عاوزة واسطة في الغالب علشان تروح مكان نضيف

    سابعا

    الوقـــــــــــائي

    بمعني انك تاخد نيابتك في الهيئات الآتية

    1 - الإدارة المركزية للشئون الوقائية ودي تحتوي علي الآتي :

    ** مكافحة الأمراض المعدية :

    المميزات
    · إمكانية التسجيل المبكر للدراسات العليا.
    · الاشتراك فى الدورات التدريبية المتخصصة.
    · الحصول على بدلات التفتيش الميدانى.
    العيوب
    انك هاتشتغل شغل إداري إلي حد ما في هذه الهيئات وغالبا مش كل التخصصات هاتقدر تلتحق بيها

    ** الحجر الصحى :
    المميزات
    · إمكانية التسجيل المبكر للدراسات العليا (باطنة ،قلب،المناطق الحارة،عناية مركزة، صحة عامة)

    · الاشتراك فى الدورات التدريبية المتخصصة.
    · الحصول على 150%من أساسي المرتب كمكافأة شهرية من حصيلة التوكيلات الملاحية
    العيوب
    انك برده هاتشتغل شغل إداري وكمان ممكن تتحدف في أي مطار او أي علي مستوي الجمهورية

    -2 الإدارة المركزية للمعامل مميزاتها :

    * التدريب على أحدث الأجهزة المعملية.

    * إمكانية التسجيل المبكر للدراسات العليا

    -3 الإدارة المركزية لشئون البيئة.

    -4 الإدارة المركزية للأمراضالمتوطنة

    ================================================

    والان مع

    كيف تختار التخصص المناسب لك ؟؟؟

    الوصايا العشر لاختيار التخصص المناسب لك

    أولا
    صلاة الاستخارة

    ثانيا
    صبـــــــــــــــرا
    ما تستعجلشي وتكتب تخصص من التخصصات الملحة بحجة انك مش عاوز تقعد في التكليف كتير وعاوز تختصر وقت وتبقي أخصائي بأسرع وقت ممكن لأنه اللي خلاك تصبر سبع سنين علشان تتخرج مش هاتصبر سنة ولا سنتين تاني وتاخد التخصص اللي بتحبه وعاوزه لأنه كل تخصص له تعبه وقرفه ولازم تكون حابب التخصص بتاعك علشان تقدر تستحمل تعبه وقرفه وعلشان تقدر تبدع فيه وتنجح فيه

    ثالثا
    حدد ميـــولك
    هل ميولك باطنية ولا جراحية ؟؟
    لو ميولك باطنية يبقي شوف ايه أكتر حاجة شغالة في السوق وبتحبها في نفس الوقت أو علي الأقل متقبلها واوعي تقؤل انه التخصص ده فيه دكاترة كتير وده فيه دكاترة قليلين لأنه مش كل الدكاترة ناجحين وممكن يظهر دكتور بتاع أطفال مثلا وسط ألف دكتور أطفال ويبقي أكتر واحد ناجح فيهم انت وشطارتك لأنه ببساطة كل التخصصات دلوقتي اتملت دكاترة ولو فيه لسه بعض التخصصات ما بقيش فيها دكاترة كتير مستقبلا هايكون فيها دكاترة كتير
    لو ميولك جراحية وتقدر تشتغل تحت ضغط وقلق عادي يبقي خد النسا بلا منازع لو مش هاتقدر تشتغل تحت ضغط وقلق يبقي خد أي جراحة تانية زي العظام أو الأنف والأذن

    رابعا
    خد اللي يناسب ظروفك
    يناسبك ظروفك الأسرية ( خصوصا للفيمال ) زي تخصص الجلدية - طب الأسرة وغيرها من التخصصات البسيطة

    خامسا
    تخصصات جامعة
    فيه تخصصات كده بتاعة جامعة ومعدل نجاح طبيب الصحة فيها قليل لعدم وجود مكان يقدر الدكتور يتعلم فيه كويس في وزارة الصحة زي تخصص الرمد – المسالك – جراحة الصدر والقلب- جراحة المخ والأعصاب – التجميل – الأوعية الدموية
    بس لو لقيت مكان كويس تقدر من خلاله تتعلم في التخصصات دي وحابب تخصص منهم يبقي اتكل علي الله وخده

    سادسا
    اجمع الداتا
    اجمع كل المعلومات بتاعتك عن التخصص اللي ناوي عليه وشوف هل لو قدمت عليه مجموعك هايجيبه وهايجيلك فين وهل عندك استعداد تروح السلوم علشان التخصص ده ولا مش عاوز تبعد عن بيتكم ؟

    سابعا
    ماستر ولا دبلومة ؟
    اسأل نفسك يا تري عاوز تحضر في التخصص ده ماستر ولا دبلومة لأنه ده هايفيدك في انك تختار التخصص علشان أوقات تخصصات معينة الماستر فيها بيكون صعب وبياخد وقت فا تتطر انك تغير التخصص

    ثامنا
    ازاي هاتتعلم ؟

    اسأل نفسك ازاي هاتتعلم في التخصص ده وتبقي فيه دكتور كويس لأنه فيه أماكن ممكن تكون قريبة منك لكن التعليم فيها مش كويس وحط لنفسك خطة ازاي تقدر تتعلم في التخصص بتاعك عن طريق انك تعمل زاير مثلا الي أي جامعة ولا تعمل انتداب الي مستشفي فيها تعليم كويس

    تاسعا
    إيـــــــــــاك
    ما تربطشي تخصصك بموضوع السفر خليه موضوع ثانوي لكن مش هو الأساس لأنك بسهولة ممكن تحصل معاك ظروف وما تقدرشي تسافر أو ممكن ما تلاقيش فرصة كويسة للسفر ولأنه السفر ده فترة مؤقتة مش هاتاخد عمرك كله في السفر فا لازم تاخد تخصص ينفع تشتغل فيه في مصر وبره مصر .

    عاشرا
    الأرزاق بيد الله
    اجعل في قلبا إيمانا دائما انه الأرزاق بيد الله في أي تخصص بتختاره ورزقك هايجيلك لحد عندك بس المفروض علينا إننا نحسن الاختيار ونسأل ونستشير و نتكل علي الله

    وأخيرا
    وفقكم الله لما يحب ويرضي


    d-forum
    مشرف عام المنتدى

    عدد المساهمات: 1204
    تاريخ التسجيل: 28/10/2009
    العمر: 39

    رد: سلسلة مستقبل طبيب ، تعرف على طريقك فى كلية الطب

    مُساهمة من طرف d-forum في 05/11/09, 05:56 pm


    وهو
    التسجيــــــــــل

    هو التقديم للالتحاق لدراسة الماجستير أو الدبلوم في تخصص ما بكليات الطب


    يوجد أكثر من هيئة تقوم بالتسجيل للأطباء المقيمين حسب مكان العمل وهم كالآتي :


    أولا
    تسجيل وزارة الصحة


    ميعاد حركة التسجيل

    أول شهر أبريل من كل عام


    شـــــروط التسجيل

    1- أن تكون طبيب مقيم في تخصص معين واخد فيه نيابة ومستلم العمل فيه

    2- أن يكون مضي عليك سنة مدة عمل فعلية في النيابة أو ست شهور لو واخد تخصص ملح بس بصراحة الشرط ده مش بيطبق يعني أنا ليا ناس أصحابي كتير أوي استلموا النيابة النهاردة وبعد أسبوع ظهرت حركة التسجيل واتقبلوا عادي .

    3- مش هاينفع تسجل في تخصص غير التخصص اللي واخد فيه نيابة .

    4- أوقات الجامعة بترفض تسجيلك لو عليك جزاءات لأنه المفروض أثناء
    التقديم للتسجيل ما تكونشي واخد جزاءات لمدة تلات سنين فاتوا أو سنتين علي الأقل .

    5- أوقات برده يرفضوا تسجيلك في الجامعة لو كان تقرير الكفاية بتاعك في
    السنتين الأخيرتين أقل من جيد .

    إجــــــراءات التسجيل
    1- لما يتم الإعلان عن حركة التسجيل تروح إدارة التدريب في المديرية اللي انت تابع ليها وتقرا عندهم الحركة وتاخد منهم ورقتين
    ورقة تعهد كفيل وورقة تانية بيتكتب فيها الرغبات .
    ورقة الكفيل
    تخلي واحد من زمايلك يمضيلك انه هو الكفيل بتاعك وتخلي اتنين تاني يمضوا علي انه الكفيل مش مرشح للسفر للخارج وانه بياناته صحيحة .
    ورقة الرغبات
    فيه بيانات بتملاها انت وفيه بيانات تملاها المديرية والإدارة
    البيانات بتاعتك
    - مطلوب فيها اسم الدراسة المطلوب الالتحاق بيها يعني ماجستير ولا دبلوم ممكن تكتبين رغبتين مختلفتين زي ماجستير ودبلوم أو العكس أو ممكن تكتب ماجستير ما جستير أو دبلوم دبلوم .
    - بعد كده مطلوب تملا تلات رغبات لتلات جامعات اللي ترغب الالتحاق للدراسة بواحدة منهم وتكتبهم بالترتيب حسب رغبتك وخلي بالك من أول رغبة .
    بيانات الإدارة
    بعد ما تملا الرغبات بتاعتك دي وتملا بقية البيانات المطلوبة منك تطلع علي الإدارة بتاعتك تملا منها بيانات إذا كان فيه إجازة بدون مرتب أم لا وتملا منها برده خانة الجزاءات وتملا منها خانة تقرير الكفاية مع انه دي ممكن من المديرية
    بيانات المديرية
    بعد كده تطلع علي المديرية تملا من عندهم بيانات التكليف وبيانات حركة النيابة بتاعتك وبيانات الوحدة الصحية اللي كنت فيها
    2- بعد كده تروح إدارة التدريب وتكون واخد معاك :
    - ورقة الرغبات دي وورقة تعهد الكفيل .
    - صورة طبق الأصل من شهادة البكالوريوس .
    - صورة طبق الأصل من شهادة التقديرات .
    - صورة طبق الأصل من شهادة الامتياز .
    - صورة طبق الأصل من شهادة الميلاد .
    - صورة طبق الأصل من شهادة التجنيد .
    - صورة البطاقة الشخصية .
    - دمغة بحوالي أربعة جنيه .
    - ملف يتحط فيه الورق ده .

    هاتروح هناك هاتراجع الورق مع الموظف المختص وهايدور علي اسمك علشان يشوفك مسجل أبل كده في أي حركة تسجيل أو إذا كنت مسجل في الزمالة أو لا وبعد كده تمشي .

    3- المديرية هاتبعت الورق ده للوزارة والوزارة هاتبعت للجامعات .

    4- في شهر سبتمبر أو أكتوبر هاتظهر نتيجة التسجيل وهايبعتوا في المستشفي انه ظهرت النتيجة بعدها هاتروح إدارة التدريب بالمديرية وتعرف منهم انت التحقت بأنهي جامعة وهايدوك جواب مهمة لمدة أسبوع تطلع علي الوزارة ومنها علي الجامعة علشان تروح تقدم الورق بتاعك ووقتها بيكونوا عاوزين ورق أصول مش صورة طبق الأصل وغالبا بيكونوا نفس الورق اللي فوق ضيف إليها كام صورة شخصية بالإضافة إلي رسوم التسجيل ودي بتختلف من جامعة للتانية وبتختلف من دبلوم إلي ما جستير بس طبعا رسوم التسجيل للماجستير أغلي من الدبلوم .

    5- قبولك في أي قسم من أقسام أي جامعة بيكون علي أسس عامة بتحطها الجامعة وشروط خاصة بيحطها القسم زي التقدير العام تقدير مادة التخصص .


    تنبيهــــــــــات هامة

    1- أبل ما تكتب رغباتك اسأل علي القسم اللي عاوز تلتحق بيه وشوف نظامه إيه والرسالة بتاعته إيه نوعها وامتحان الفيرست بيكون امتي وامتحان السكاند امتي
    اسأل علي كل حاجة تخص التسجيل بالدبلوم أو الماجستير في القسم نفسه وممكن تلاقي لائحة الكلية في التسجيل لأنه كل جامعة ليها شروط ولوائح بس برده في الآخر كل قسم وبيكون له سياسته ونظامه .

    2- لو فرض انك واخد جزاء تشوف هل الجزاء ده مر عليه أكتر من ست شهور
    لو مر عليه أكتر من ست شهور يبقي المفروض انه يتشال لأنه أي جزا المفروض انه بعد ست شهور الإدارة تبعت للمديرية علشان يدخل لجنة ويتشال عنك لو ما اتشالشي يبقي بسرعة حاول تخلي الإدارة تبعته للمديرية وهناك في المديرية يدخل لجنة علشان يتشال ولو رفضت الإدارة إرسال الجزاء للمديرية علشان يتشال عنك هددهم انك هاتشتكيهم في النيابة الإدارية لأنه ده شغلهم والمفروض كانوا رفعوا الجزاء لوحدهم بعد ما مر عليه ست شهور أما لو كان مر عليه أقل من ست شهور مش هاتقدر تشيله وساعتها هايتكتب في الورق بتاعك
    وممكن لو عليك جزا وليك علاقة حلوة مع الموظف بتاع الشئون القانونية ما يكتبشي انه عليك جزا أساسا .
    3- يكون أفضل لو كنت تعرف واحد زميلك أو صاحبك أخد دبلوم أو ما جستير في نفس القسم ونفس الجامعة اللي جالك فيها التسجيل علشان تقدر تعرف منه كل حاجة عن القسم والأسئلة ونظام الامتحان والكتب اللي بيتذاكر منها وكل حاجة .

    4- يكون أفضل لو سجلت في قسم بيسمح انك تاخد نايب زاير عنده بس بشرط يكون النايب الزاير بيشتغل زيه زي النايب العادي لأنك بعد الفيرست ممكن تعمل تفرغ من وزارة الصحة وتروح تشتغل نايب زاير في القسم وبكده تقدر تاخد السكاند وتناقش الرسالة بتاعتك بسلام وبسرعة لأنك هاتتعرف علي الاستاف كله والمفروض انه علاقاتك تكون حلوة معاهم وماتعملشي مشاكل وفي نفس الوقت تتطحن نفسك شغل علشان تتعلم كويس .

    5- إيه قصة التفرغ ده : معناه انك لو مسجل ماجستير تقدر بعد الفيرست تقدم علي تفرغ من وزارة الصحة ( اجازة ) بحيث المرتب بتاعك وحوافزك يتصرفوا عادي من وزارة الصحة وما تشتغلشي أي حاجة إلا إذا كنت عاوز تعمل زاير تروح تقدم في الكلية وفي القسم بتاعك علي نايب زاير لو كانوا بيقبلوا نظام الزاير أو تقدم زاير في أي مكان تاني لو مش بيقبلوا زاير في المكان اللي انت مسجل فيه
    والتفرغ ده لمدة سنة أو سنة ونص بالكتير حسب موافقة وزارة الصحة وموافقة الجامعة .

    6- فيه جامعات بتطلب منك نسبة حضور معينة ولو اتعديت النسبة دي مش هاتقدر تدخل الامتحان خصوصا في امتحان السكاند وفيه جامعات مش بدقق علي الحضور بس عامة لو الفيرست مش محتاج حضور أوي لكن السكاند لازم الدكاترة يشوفوك .

    7- مش هاتقدر تغير التخصص اللي انت مرشح ليه بمعني انك كاتب نسا مثلا مش هاتقدر تخليها عظام لكن تقدر تغير من ماجستير إلي دبلومة والعكس بعد موافقة الكلية .

    8- مش هاتقدر تسجل لو انت مسجل في الزمالة المصرية أو كنت خارج مصر أو مكنتش علي قؤة العمل بس فيه ناس زمايلنا سجلوا أبل ما سافروا ونزلوا امتحنوا والمديرية طبعا مش عارفة إنهم مسجلين

    9- لو فرض انك اعتذرت عن التسجيل هاتتحرم من التقديم للتسجيل لمدة تلات سنوات إلا إذا كان اعتذاراك حاجة من اتنين مرافقة زوج أو رعاية طفل بشرط موافقة الكلية .

    10- تقدر تاخد اجازة أبل الامتحانات بشويه وتاخد اجازة أثناء الامتحانات ودي معترف بيها واسمها اجازة امتحانات وانت بتظبت نفسك مع زمايلك النواب في القسم ومع مدير المستشفي .

    11- لو انت مثلا من سوهاج ومسجل في عين شمس تقدر تعمل انتداب لأقرب مستشفي صحة في القاهرة لتسهيل الحضور في الكلية وتسهيل الدراسة وممكن تحضر تعمل حاجة اسمها تسهيل دراسة بمعني انك تحضر تلات أيام في الجامعة وتلات أيام في الصحة

    12- الكلية بتديك أكتر من فرصة لدخول الامتحان بمعني انك لو سقطت ممكن تدخل الامتحان تاني وغالبا تالت . وممكن كمان تأجل الامتحان بتاعك لأنه الامتحانات في أغلب الكليات بيكون في أبريل وفي أكتوبر ولو سقطت في مادة في الفيرست ممكن تدخلها في الدور اللي بعده ما عدا جامعة الأزهر لو سقطت في مادة بتعيد كل مواد الفيرست .

    13- ممكن تاخد اجازة بدون مرتب بعد أول سنة من التسجيل دا لو انت مسجل دبلومة أما لو مسجل ماستر يبقي ممكن تاخد اجازة بدون مرتب للدراسة بعد ما يخلص التفرغ والإجازة دي هاتمتد لأقرب دور هاتدخل فيه الامتحان .

    14- لو ظهرت حركة التسجيل وحبيت تغير الجامعة اللي اتقبلت فيها ده ممكن بس بموافقة الجامعتين اللي قبلتك واللي رايحلها لأنه أوقات أقسام بترفض

    15- لو حصل انه مفيش رغبة من الرغبات التلاتة جاتلك يبقي تروح الوزارة وتختار جامعة معينة والوزارة تديك جواب تروح بيه الجامعة وتستني لحد ما تعرف القسم قبلك ولا لأ

    16- طب الأزهر بيشترط عليك انك تمتحن فيه مواد شرعية ضمن الفيرست .

    17- جامعة قناة السويس بتسمح بتسجيل الماجستير أو الدبلومة للي يمر عليه ست شهور في التكليف أو النيابة

    18- علشان تدخل الفيرست بتتطر انك تستني ست شهور يعني هاتتقبل في شهر أكتوبر مثلا وهاتدخل الفيرست في أبريل وأغلب الجامعات بتعمل كده لكن فيه جامعات زي جامعة أسيوط بتدخل الفيرست بعد مرور سنة من التسجيل يعني تسجل في أكتوبر وتدخل الفيرست في أكتوبر اللي بعده .
    19- لازم تلف علي الأقسام علشان تعرف الكوريكيولم ( المقرر ) بتاع الفيرست لو مسجل ماجستير أو دبلومة حديثة وما تعتمدشي علي كوريكيولم بتاع سنة أبلها لأنه الأقسام تضيف حاجة أو تشيل حاجة .

    20- لو انت مسجل ماجستير أو دبلومة حديثة هاتدخل السكاند بعد مرور سنة
    من الفيرست أو ممكن سنة ونص في بعض الجامعات ولو مسجل دبلومة
    قديمة في شهر أكتوبر مثلا يبقي هاتمتحنها في أكتوبر اللي بعده امتحان واحد


    21- لو مسجل ماجستير فيه جامعات بتبدأ فيرست وبعد كده سكاند بعد كده رسالة وفيه جامعات تانية فيرست وبعد كده رسالة بعد كده سكاند .

    22- فيه جامعات الرسالة بتاعتها عبارة عن مقالة ( essay ) ودي أسهل نوع
    وفيه جامعات تانية الرسالة بتاعتها ( Thesis ) وفيه أوقات أقسام بتخلي الرسالة بتاعتها حاجة اسمها (**** analysis ) حسب سياسة كل قسم .

    23- بالنسبة للدبلومة فيه نوعين من الدبلوم :


    *دبلومة حديثة : دي بتتكون من جزئين فيرست وسكاند ونفس امتحانات الماجستير بالظبط لدرجة انه اللي بيمتحن ماجستير بيكون جنبك في الامتحان
    بس اللي يفرقها عن الماجستير انه مفيهاش رسالة ولو حبيت بعد ما تخلصها
    تخليها ماجستير يبقي تحضر رسالة وبس وبكده تبقي الدبلومة دي ماجستير .
    والدبلومة دي هاتلاقيها في عين شمس وبنها وشبين وجامعات أخري .
    * دبلومة قديمة : ودي جزء واحد بس وان شون ومش هاينفع تخليها ماجستير ودي هاتلاقيها في جامعة أسيوط وجامعات أخري .



    ثانيا
    تسجيل الطبيب الحر


    كلمة طبيب حر للأطباء اللي استقالوا من وزارة الصحة

    الأطباء دول يقدروا يسجلوا في أي وقت لما الجامعة تفتح باب التسجيل وعلشان يسجل لابد يقدملهم الآتي :
    - شهادة إلغاء التكليف ( قرار الاستقالة ) ودي بتطلع من الوزارة ( أصل )
    - شهادة طبيب حر من النقابة ( أصل )
    - بطاقة شخصية يكون مكتوب فيها الوظيفة طبيب حر
    - إضافة اللي باقي ورق اللي قولناه فوق .



    ثالثا
    تسجيل الشرطة والحربية والتأمين وباقي الهيئات


    الهيئات دي عندهم نواب وبيخلوهم يسجلوا بسرعة تقريبا في أول حركة تسجيل بتنزل يقدروا يسجلوا أو بعد ست شهور من استلامهم العمل أهم حاجة موافقة جهة العمل بتاعتهم



    مواعيد التسجيل لأشهر كليات الطب في مصر

    القصر العيني
    التسجيل في القصر العيني بيفتح في شهر سبعة من كل عام لمدة شهرين والفيرست بيكون في أبريل اللي بعده ولو انت مسجل ماجستير القصر العيني في الغالب كل الأقسام بتشترط عليك انك تاخد عنهم نايب زاير عندهم بعد الفيرست

    عين شمس

    التسجيل بيكون مرتين في السنة مرة في شهر سبعة من كل عام لمدة شهر لو انت مسجل ماجستير يبقي الفيرست بيكون في أبريل والمرة التانية في شهر نوفمبر من كل عام لمدة شهر والفيرست بيكون في أكتوبر

    طب الأزهر

    التسجيل بيكون مرة واحدة في السنة في شهر سبتمبر من كام عام

    طب الإسكندرية

    التسجيل بيكون مرتين في السنة مرة في أغسطس ومرة في نوفمبر

    طب أسيوط
    التسجيل بيكون في أبريل وأغسطس من كل عام

    طب الزقازيق
    التسجيل بيكون في شهر أغسطس من كل عام

    طب شبين الكوم

    التسجيل مرتين في السنة مرة في شهر أبريل ومرة في شهر أكتوبر


    ملاحظة مهمة :
    مواعيد التسجيل للكليات ممكن يتغير بس إحنا قؤلنا اللي ماشي اليومين دول في الكليات دي لأنه كل سنة وليها ظروفها .



    نبذة عن

    التسجيل اليجال ( الغير قانوني )

    وده بيتم بكذا طريقة

    - أول طريقة : انك تضرب شهادتين ( مزورين ) واحدة بتاعة الاستقالة وواحدة بتاعة النقابة وبذلك تبقي طبيب حرة وتقدم في أي جامعة كطبيب حر بس 99 % من الجامعات واخدين بالهم من الموضوع ده اليومين دول ومش بيقبلوا أي حد كده وخلاص وأوقات كتير بيبعتوا للنقابة علشان يتأكدوا انك طبيب حر ولو كشفوك هايلغوا التسجيل بتاعك ولو مشيوا رسمي ممكن تتهم بالتزوير وتحاسب قانونيا .

    - تاني طريقة : كانت عن طريق موظفين في الوزارة بالرشوة بحيث يضيف اسمك في قائمة الأسماء اللي رايحة الجامعات بس الموظفين دول اتقفشوا واتحولوا للتحقيق وبطلوا يعملوا الموضوع ده .



    بالنسبة لحرمانية التسجيل بهذه الطرق أنا ما اعرفشي مدي حرمانيتها بس احساسي بيقؤلي إنها حرام أقل حاجة علشان التزوير والغش وتاني حاجة علشان الرشوة

    طبيب زاير

    معناه انك تشتغل في قسم معين في مستشفي جامعي بحيث تدفع رسوم سنوية أو شهرية نظير شغلك في القسم وفيه أقسام في جامعات النايب الزاير بيشتغل نفس شغل النايب الأساسي وفيه أقسام تانية النايب الزاير مش زي النايب الأساسي في حجات كتير وممنوع عليه حجات كتير وفيه أقسام في جامعات بتشترط في التسجيل انك تاخد عندهم زاير وفيه أقسام تانية في جامعات كتير مش بتقبل زاير أساسا

    مثال لإجراءات النايب الزاير في عين شمس
    بتروح شئون الأطباء مستشفي الباطني الدور التاني(علوى)تاخد استمارة فيها بياناتك اسمك وتخرجك
    فيها جزء بموافقه رئيس القسم و مدير المستشفي وتروح تمضيهم وتدفع 400ج مصاريف اداريه و200ج عن كل شهر الأولي في المستشفي والتانيه للقسم

    وتاخد معاك
    شهادة التخرج
    شهادة الامتياز
    شهاده الطبيب الحر


    أو

    موافقة جهة العمل
    أو
    إجازة

    التقديم من يوم 1 إلي يوم 20 في الشهر



    دكتوره سمر
    عضوا دائم
    عضوا دائم

    عدد المساهمات: 56
    تاريخ التسجيل: 22/11/2009

    رد: سلسلة مستقبل طبيب ، تعرف على طريقك فى كلية الطب

    مُساهمة من طرف دكتوره سمر في 23/11/09, 06:22 pm

    شكرا وبارك الله بكم

    d-forum
    مشرف عام المنتدى

    عدد المساهمات: 1204
    تاريخ التسجيل: 28/10/2009
    العمر: 39

    رد: سلسلة مستقبل طبيب ، تعرف على طريقك فى كلية الطب

    مُساهمة من طرف d-forum في 04/12/09, 05:02 pm



    General Practitioner
    عضوا دائم
    عضوا دائم

    عدد المساهمات: 291
    تاريخ التسجيل: 26/10/2009

    رد: سلسلة مستقبل طبيب ، تعرف على طريقك فى كلية الطب

    مُساهمة من طرف General Practitioner في 05/12/09, 03:54 pm


    غربة قلم
    عضوا
    عضوا

    عدد المساهمات: 6
    تاريخ التسجيل: 29/07/2010

    رد: سلسلة مستقبل طبيب ، تعرف على طريقك فى كلية الطب

    مُساهمة من طرف غربة قلم في 08/08/10, 12:12 am

    الف الف الف الف
    شــكـر
    هذا اللي ننتظره من زمان

      الوقت/التاريخ الآن هو 31/10/14, 03:19 pm